Futzal. O'zbekiston terma jamoasi Rossiyaga ketish oldidan kecha so'nggi mashg'ulotni o'tkazdi + FOTO

Bahodir Ahmedov boshchiligidagi terma jamoamiz bugun tongda Rossiyaga uchib ketishdi. Kecha jamoa safar oldidan so'nggi mashg'ulotini o'tkazdi. Unda darvozabon Akmal Xazratqulov engil shamollagani bois ishtirok etmadi, qolganlar to'liq shug'ullanishdi. Bundan tashqari, yoshlar terma jamoamiz kiperlari Sunnatjon Anvarov va Mirislom Miralievlar ham mashg'ulotda ishtirok etishdi. Safaroldi mashg'ulot bo'lgani sabab murabbiylar og'ir mashqlardan foydalanishmadi, asosan o'yin payti yuzaga keladigan turli vaziyatlar, o'ynovchi darvozabon bilan harakat qilish va to'p bilan ishlashga etibor qaratildi.

O'zbekiston terma jamoasining Rossiyaga boradigan tarkibi haqida oldinroq xabar bergan edik. Terma jamoamiz Ekaterinburgda Rossiyaning "Viz-Sinara" va "Zik-Urfu" jamoalariga qarshi ikkitadan o'rtoqlik o'yini o'tkazadi.

Bo'lajak yig'in O'zbekiston futzal termasi uchun Turkmaniston poytaxti Ashxobod shahrida yopiq inshootlarda bo'lib o'tadigan 2017 yilgi Osiyo o'yinlari va futzal bo'yicha 2018 yilgi Osiyo chempionati saralash bahslariga tayyorgarlik vazifasini o'taydi.

Malumot uchun, Ashxoboddagi Osiyo o'yinlari shu yilning 16–26 sentyabr kunlari o'tkaziladi.

Futzal bo'yicha O'zbekiston milliy terma jamoasining kechagi mashg'ulotidan to'liq fotogalereyani birozdan keyin saytimizda tomosha qilishingiz mumkin bo'ladi.