Bugun futbol. "Navbahor" - "Dinamo"

"Navbahor" o'z maydonida Samarqandning "Dinamo" klubini qabul qiladi. "Navbahor" ikkinchi davrani juda yaxshi boshladi. Jamoa safarda "Obod"ni va o'z maydonida "Qizilqum"ni mag'lub etib, keyin Farg'onada "Neftchi" bilan durang o'ynadi. 

Namanganliklar birinchi davraning dastlabki uch turida to'rt ochko jamg'arishgandi, bu safar esa etti ochko to'plashdi. Kim biladi deysiz, balki "Navbahor"ning ikkinchi davradagi ishtiroki birinchi davraga nisbatan ancha sermahsul chiqar. 

"Dinamo"ning esa aksincha ikkinchi davrada ishlari yurishmayapti. Jamoa hozircha uch o'yinda atigi bir ochko to'pladi. Ketma-ket ikkita mag'lubiyatdan so'ng nihoyat "Paxtakor" bilan durang qayd etildi. "Dinamo" birinchi davrani qatorasiga uch g'alaba bilan boshlagandi. Ammo hozirgi jamoadan uchta g'alabani kutish qiyin. 

Bundan tashqari, "Dinamo" safarda doim ham bir tekis o'yin namoyish eta olmayapti. Samarqandliklar Farg'onada "Neftchi"ni mag'lub etib qaytishganidan beri keyingi ikkita o'yinni boy berishdi. Jamoa Toshkent va G'uzorda mag'lub bo'ldi. Fikrimizcha, "Dinamo" bugun ham g'alaba uchun o'ynaydi. O'z navbatida "Navbahor"ni uydagi bellashuvda faqat uch ochko qoniqtiradi. Eslatib o'tamiz, Samarqandda kechgan birinchi davra bahsida "Dinamo" 0:1 hisobida yutqazib qo'ygan.