“Bunyodkor” tarbiyalanuvchilari Bolgariyadagi turnirda g'olib chiqishdi

Bolgariyaning Byala va Obzor shaharlarida o'tayotgan musobaqada “Bunyodkor” futbol maktabining 2006 va 2008 yillarda tavallud topgan tarbiyalanuvchilari guruh bosqichini muvaffaqiyatli yakunlashib, yarim finalga yo'llanma olishgandi.

Akmal Risqullaev boshchiligidagi 2006 yilda tavallud topgan “Bunyodkor-A” jamoasi Moldaviyaning “Dachiya” klubini 6:2 hisobida mag'lubiyatga uchratishib, final yo'llanmasini qo'lga kiritishdi. Abdumalik Rahimov boshqaruvidagi “Bunyodkor-B” vakillari esa Rossiyaning “Dmitrovgrad 1947” futbol maktabi tarbiyalanuvchilaridan 3:1 hisobida ustun keldi.

SHu tariqa, hal qiluvchi final bahsida “Bunyodkor-2006”ning ikkala jamoasi o'zaro bellashdi. Unda Akmal Risqullaev boshchiligidagi “Bunyodkor-A” 4:2 hisobida g'alaba qozonib, musobaqa g'olibligini qo'lga kiritdi.

2008 yilda tavallud topgan futbolchilar o'rtasidagi turnirda 6ta jamoa bir-birlari bilan o'zaro o'yin o'tkazib, yakunda eng ko'p ochko jamg'argan jamoa g'oliblikni qo'lga kiritishi turnir nizomida belgilab qo'yilgandi. Unga ko'ra, Abdujabbor Marufaliev va Furqat Samegov boshchiligidagi tarbiyalanuvchilarimiz ikkinchi o'rinni qo'lga kiritishdi.