Birodar Abduraimov: "Hal qiluvchi o'yinlarda ko'p narsa murabbiyga bog'liq bo'lib qoladi"

JCH-2018 saralash bosqichida avvaliga Xitoyda to'p tepsak, keyin o'z maydonimizda Janubiy Koreyani qabul qilamiz. Endilikda bor etiborimiz mana shu bahslarga qaratiladi. Taniqli futbol faxriysi Birodar Abduraimov "Futbol Ekspress" gazetasiga bergan intervyusida Xitoyga qarshi uchrashuv oldidan o'z fikrlari bilan o'rtoqlashdi. 

- Albatta, butun xalqimiz terma jamoadan faqat g'alaba kutyapti, - deydi Birodar Hasanovich. - Saralash o'yinlarining oxirgi bosqichida ko'p narsa murabbiylarga bog'liq bo'lib qoladi. SHuning uchun Xitoy bilan o'yinda ikkala murabbiylar o'rtasida kurash kechadi. Menimcha, aynan murabbiylarning topqirligi va bilimi ko'p narsani hal qiladi. Hozir jamoamizni tanqid qilmasdan ularga faqat omad tilash kerak. Agar terma jamoamiz Xitoydan g'alaba bilan qaytsa, bu Mustaqillik bayrami uchun yurtdoshlarimizga ajoyib sovg'a bo'ladi. 

Xitoy jiddiy raqibmi? 

- Men ularning bir-ikkita o'yinini ko'rganman. Xitoy - jiddiy raqib. Ularning futbolchilarida yuqori texnika yo'q, ammo harakatchan. Tezkor va mehnatkash. Bundan tashqari, ularning murabbiyi Marchello Lipppiga ham alohida etibor qaratish kerak. U bunday muhim pallada futbolchilarga tegishli ko'rsatmalarni berishga qodir. Yashirmayman, men aynan Lippidan xavotirdaman. Ammo Xitoy bilan bemalol o'ynasa bo'ladi.