"Xitoylik Runi" O'zbekiston bilan o'yin oldidan qanday fikrda?

Xitoy terma jamoasi yarim himoyachisi Vang Yongpo (14-raqam) FIFA rasmiy saytiga intervyu berib, bo'lajak bahs oldidan o'z fikrini bildirdi.

SHuni aytish lozim, bu futbolchini muxlislar Xitoyda "Xitoylik Runi" deb chaqirishadi. Xitoy o'z maydonida Janubiy Koreyani 1:0 hisobida mag'lub etganida aynan uning to'p uzatishidan so'ng YU Dabao yagona golni urgandi. 

2015 yildan beri terma jamoada o'ynab kelayotgan "Xitoylik Runi" shunday deydi: 

- "Biz O'zbekiston termasini mag'lub etish uchun bor kuchimizni ishga solamiz. Maqsad - faqat g'alaba. O'yinni yutib o'z muxlislarimizga quvonch ulashishni xohlaymiz. O'zbekiston - kuchli raqib, menga bu jamoa yoqadi. Ular yaxshi shakllangan va futbolni ham yaxshi o'ynashadi". 

Vang Yongpo bungacha "SHandong Luneng" safida to'p tepib kelayotgandi. Endilikda u "Tiyanjin" klubi azosi hisoblanadi. Uni yangi jamoaga shaxsan bosh murabbiyi Fabio Kannavaro taklif etgan. 

Yana bir qiziq jihati, "Xitoylik Runi" 30 yoshida terma jamoaga ikkinchi bor Marchello Lippi tomonidan chaqiruv oldi. U Lippi qo'l ostida birinchi bor Janubiy Koreyaga qarshi maydonga tushib, bu o'yinda xitoyliklar 1:0 hisobida g'alaba qozonishdi. Vang Yongpo italiyalik murabbiyga quyidagicha tarif berdi: 

- "Marchello Lippi murabbiy sifatida juda kuchli shaxs. U bizga ko'proq hujum qilish hamda oxirigacha o'ynash kerakligini aytadi. Orqaga yotib olsak unga yoqmaydi. Oldinlari biz birinchi golni urib olgach orqada o'ynardik. Lekin Lippi yana hujumga o'tish kerakligini aytmoqda. To'g'ri, bizda imkoniyat kam, lekin oxirigacha kurashamiz. Buni murabbiyimiz ham tinmay takidlayapti".