“Metallurg” – “Paxtakor”, prevyu

Jamoalar bugungacha milliy chempionatlarimiz doirasida 39 ta uchrashuv o'tkazishgan. SHulardan 31 tasida toshkentliklarning qo'li baland kelgan. 4 ta uchrashuvda durang qayd etilgan bo'lsa, yana 4 ta o'yinda bekobodliklar zafar quchishgan. Mazkur o'yinlarda darvozalarga kiritilgan va o'tkazib yuborilgan to'plar farqi ham paxtakorchilar foydasiga – 101:31. “Metallurg”ning paxtakorchilar ustidan qozongan eng yirik g'alabasi 3:1 va 2:0 bo'lsa, eng yirik hisobdagi mag'lubiyati – 0:6.

Bekobodliklar “Paxtakor” ustidan erishgan g'alabalarining barchasiga o'z maydonlarida erishishgan. Bu asosan so'nggi mavsumlarda qayd etilganligi bu galgi o'yinga ham umid ko'zi bilan qarashga asos bo'ladi.

Faqatgina bitta muammoli jihati mazkur uchrashuvda “Metallurg”ning asosiy tarkibidan uch nafar futbolchi maydonga tusha olmaydi. To'rttadan sariq kartochkalari to'planib qolganligi bois Murodjon Toshmatov, Alisher Ziyovuddinov hamda Mirg'iyos Sulaymonovlar jamoadoshlariga yordam bera olishmaydi.
Uchrashuv hakamlari haqida

O'zbekiston futbol federaciyasi Professional futbol ligasi elon qilgan ro'yxatga binoan “Metallurg” – “Paxtakor” uchrashuvida poytaxtlik hakamlar brigadasi ishlaydigan bo'ldi. Bosh hakam – FIFA referesi Vadim Agishevga qanotlarda Timur Galeev hamda Akbar Po'latovlar yordam berishadi. Zahira hakami Rustam Lutfulin bir kun muqaddam o'tadigan yoshlar tarkiblari uchrashuvida bosh hakam vazifasini o'tab beradi.

9 sentyabr (shanba)
Metallurg (Bekobod) – Paxtakor (Toshkent)
Hakamlar: V. Agishev (Toshkent), T. Galeev (Toshkent), A.Po'latov (Toshkent), R. Lutfulin (Toshkent)
Nazoratchi hakam: S. Najafaliev (Toshkent).
O'zPFL vakili: A. Inoyatov.
Raqibimiz – “Paxtakor” haqida

 “Metallurg” XXVI milliy chempionatimizning 20-turida o'z maydonida mamlakatimizning eng nomdor jamoasi, o'n bir karra O'zbekiston chempioni – Toshkentning “Paxtakor” jamoasini qabul qiladi. Paxtakorchilar milliy chempionatimizda 1992, 1998, 2002-2007, 2012, 2g'14-2015 yillarda g'alaba qozonishgan. SHuningdek, toshkentliklar hisobida milliy chempionatlarimizda 5 ta kumush, bitta bronza medali ham bor. Bundan tashqari jamoa O'zbekiston kubogini ham eng ko'p qo'lga kiritgan klub sanaladi. Mamlakat kubogi bahslarida ham toshkentliklar 11 marta zafar quchishgan.

“Paxtakor” mustaqillik yillarida xalqaro maydonlarda ham mamlakatimiz sharafini munosib himoya etgan. Osiyo futbol konfederaciyasi chempionlari ligasida jamoa ikki marta yarim finalga chiqqan.

Bevosita jamoa tarixi haqida qisqacha malumot beradigan bo'lsak, klubga 1956 yilda asos solingan. 36 yil mobaynida sobiq Ittifoq chempionatida O'zbekiston Respublikasining bosh jamoasi sifatida qatnashgan. 1992 yildan etiboran Mustaqil milliy chempionatimizning uzluksiz qatnashchisi. Jamoa laqabi – sherlar.
Oliy liga bahslarida paxtakorchilar bugunga qadar 758 ta uchrashuv o'tkazib, shulardan 512 tasida g'alaba qozonishgan. 123 o'yinda durang o'ynashgan bo'lsa, xuddi shuncha o'yin – 123 tasida mag'lubiyatga uchrashgan. Paxtakorchilar raqiblari darvozasiga 1704 ta to'p kiritishgani holda o'z darvozalaridan 649 ta gol o'tkazib yuborishgan. Jamoaning eng yirik hisobdagi g'alabasi – 11:0 (“Qizilqum”, 2007 yil), eng yirik mag'lubiyati – 0:4 (1995 yil – MHSK, 2002 yil – “Nasaf”, “Neftchi”).