110 yillik derbi oldidan Konte nimalar dedi?

Unda murabbiy boshlang'ich tarkibni tanlashda nimalarga ahamiyat berishini aytdi. "Stemford Brij" stadionida yakshanba kuni 110 yoshni qarshi oladigan derbi bo'lib o'tadi.

"Menda o'yinchilarni jismoniy holatini tekshirish uchun yana bir kun bor, keyin "Arsenal" bilan o'yinga eng yaxshi qarorni qabul qilaman. O'yinchilarim oldingi bahsda o'zlarini yaxshi ko'rsatishdi. Men ularning o'yinidan qoniqdim. Endi bizni yana bir qiyin o'yin kutyapti. "Arsenal" Angliyadagi oltita eng yaxshi jamoalardan biri. Ularda juda yaxshi tarkib mavjud va ular sovrin uchun kurasha oladilar. "Arsenal"ga qarshi o'yinlar har doim "Manchester Siti", "Manchester Yunayted", "Liverpul" va "Tottenxem" kabi muhim hisoblanadi", - deya Kontening so'zlaridan iqtibos keltirdi "ko'klar" rasmiy sayti.

"Hamma narsa bo'lishi mumkin. Biz raqiblarimiz bilan kurashishimizga to'g'ri keladi. Men ularning payshanba kuni bo'lib o'tgan Evropa ligasidagi o'yinini ko'rdim, ular tarkibda katta o'zgarishlar qilishdi va ko'p futbolchilarga bizga qarshi bahs oldidan dam olish imkoniyatini berishdi. Ularning bizdan keyin o'ynashgani bizga ustunlik beradi deb o'ylamayman. Bu o'yinni o'n bir asosiy tarkib futbolchilar bilan tugatishga umid qilaman", - deb aytib kuladi Konte.

Konte "Uembli"da oxirgi ikkita o'yinda "Arsenal"ga yutqazishganini eslab -o'yinda kuchlilar yutadi deb qo'shimcha qildi.