“Navbahor” – “Metallurg”: Uchrashuvdan so'ng murabbiylar nima deyishdi?

Rustam Mirsodiqov (“Metallurg” jamoasi bosh murabbiyi): - O'yinni o'zinglar ko'rdinglar, keskin va murosasiz ruhda o'tdi. O'z imkoniyatimizni kutdik. Maydonda 10 kishi bo'lib qolganimizdan so'ng bitta gol urishga erishdik. Agarda kamchilikda o'ynab gol urishimizni oldindan bilganimda, bahsni 10 kishi bo'lib boshlagan bo'lardi. Mezbonlarda ham gol urish uchun bir qator imkoniyatlar bo'ldi. Agarda ular vaziyatlardan foydalanishganida hisob yirik ko'rinish olishi ham mumkin edi. Futbol shunisi bilan qiziq oldindan bir narsa deb bo'lmaydi. O'yin endigina yakunlandi. SHu sababli keskin fikr bildirish mumkin. Barchasini o'zinglar ko'rdinglar. Hozir biror-bir nima deganim bilan natija o'zgarishsiz qoladi. Bir so'z bilan aytganda buni foydasi bo'lmaydi.

Ilhom Mo'minjonov (“Navbahor” jamoasi bosh murabbiyi): - Muborakda uchralgan alamli mag'lubiyatdan keyin “Metallurg” jamoasiga qarshi uchrashuvda jiddiy tarzda tayyorgarlik ko'rgandik. O'z navbatida raqib jamoa o'yinini futbolchilar birgalikda ko'rib chiqqandik. Xudoga shukurki, yigitlar bugun o'zlarini g'alabaga loyiq ekanliklarini ilk daqiqalardanoq namoyish etishdi. Buning samarasi o'laroq 2:1 hisobidagi g'alabani qo'lga kiritdik. Garchi “Metallurg” jamoasining so'nggi turlarda omadi kelmagan bo'lsada jiddiy raqiblar sirasiga kiradi. O'z maydonimizda to'p surganligimiz sababli qanday holat bo'lishidan qatiy nazar yutishimiz kerak edi. Yakunda muxlislarimiz oldida yuzimiz yorug' bo'ldi. Ishqibozlarimizga jamoani qo'llab-quvvatlab turganliklari uchun rahmat aytaman. Darko Stanoevich aslida qanot futbolchisi sanalmaydi. O'ng qanot himoyasida Bu joyda Abbos Otaxonov va Jahongir Mehmonovlar ham o'ynay olishadi. Hozirda ulardan Darko kuchliroq bo'lganligi sababli uning xizmatlaridan aynan o'ng qanot himoyasida foydalanyapmiz. O'yini biroz o'xshamadi va hujumkor o'yin ko'rsata olmadi. Keyingi o'yinlarda yanada yaxshiroq harakat qiladi deb o'ylayman. Abbos Maxstaliev ayni paytda optimal sport formasida bo'lmaganligi sababli uni maydonga tushirmadim. Mashg'ulotlarda yaxshi ishlab yana oldingi sport formasiga qaytadi deb o'ylayman. CHunki, u kuchli futbolchilar sirasiga kiradi va tez orada asosiy tarkibga qaytadi.