Andrey Demchenko: "So'nggi daqiqalarda gol o'tkazish... alam qiladi"

- So'nggi daqiqalarda mag'lubiyatga uchrash har doim yoqimsiz bo'lgan. Lekin bu futbol! Futbolda vaziyat har soniyada o'zgarib ketishi mumkin, shuning uchun ham bu o'yin barchaga yoqadi. Bugungi mag'lubiyatimiz haqida nima deyman? Bugun uch ochko qo'lga kiritishimiz uchun bizga hech kim halaqit bergani yo'q. SHunchaki, vaziyatlardan foydalana olmaslik, bu boradagi ko'rsatkichning juda pastligi hatto durangni ham ushlab qola olmasligimizga olib keldi. Vaholanki, "Olmaliq" darvozasini ishg'ol qilishimiz uchun bizda anchagina imkoniyat bo'ldi.

Futbolchilarim charchab qoldimi? Bu futbolda bo'lib turadigan holat. 90 daqiqa, bunday bosimdagi uchrashuvning oxirida o'yinchilarda charchoq bo'lishi tabiiy, kerak bo'lsa, mezbonlarda ham bu sezildi. SHunday bo'lsa-da, yigitlar g'alabani "yulib" olishga, Olmaliqdan uch ochko bilan qaytishga harakat qildi. Ammo foydalana olmadik. Aksincha, bittagina vaziyatda "koncentraciyani" yo'qotishimizdan mezbonlar bundan foydalanishdi.

Mezbonlar standart vaziyatlarga, qisqa va uzoq masofalarga to'p uzatishga asoslangan o'yin namoyish qilishini bilardik. Biz bunga juda yaxshi tayyorgarlik ko'rgandik. O'ylaymanki, bir-ikki vaziyatni inobatga olmasa, aksar daqiqarda bu borada raqibga imkoniyat berganimiz yo'q.