Bugun futbol. Oxirgi to'rt o'yinda 12ta gol urgan "Paxtakor" amaldagi chempionga qarshi

Mamlakatimizning amaldagi chempioni "Lokomotiv" o'z maydonida "Paxtakor"ni qabul qiladi. Bu to'qnashuvga ortiqcha tarif berish shart bo'lmasa kerak. Jamoalarning turnir jadvalida egallab turgan o'rnidan qatiy nazar bugun TTZdagi "Lokomotiv" stadionida qiziqarli bahs kechishi kutilmoqda. 

Ikkala jamoa ham ikkinchi davrada hozircha beshtadan o'yin o'tkazdi. "Lokomotiv" shundan uchtasidan g'alaba qozongan bo'lsa, "Paxtakor" ham shuncha o'yinda yutuqqa erishdi. "Lokomotiv" uyda "SHo'rtan", safarda esa "So'g'diyona" va "Metallurg" klublarini mag'lub etdi. "Paxtakor" esa o'z maydonida "Neftchi" bilan "SHo'rtan", safarda "Metallurg" klublaridan ustun keldi. 

Bilasizmi? "Lokomotiv" ikkinchi davrada uy o'yinlarida bittadan ko'p gol ura olmayapti. Bu jamoa o'z maydonida "Mashal" bilan 1:1 o'ynagan bo'lsa, "SHo'rtan"ni zo'rg'a 1:0 hisobida mag'lub etdi. 

Ko'pchilikni qiziqtirayotgan savol: "Paxtakor" SHota Arveladze boshchiligida kuchayishga erishdimi? O'ylaymizki, bu savolning javobini bugungi o'yindan so'ng bilib olamiz. CHunki "Paxtakor" bungacha g'alaba qozongan o'yinlarda raqiblar unchalik kuchli emasdi. "Paxtakor" safarda "Qizilqum" va "Dinamo" kabi o'rtamiyonalarni enga olmadi, shunday bo'lsa-da, jamoa "Lokomotiv" maydonida uch ochkoni qo'lga kirita olarmikan... 

Qolaversa, Arveladzening "Lokomotiv" "Paxtakor" uchun ashaddiy raqib ekanligidan xabari bormi? Agar murabbiy bu haqda bilsa va shogirdlarini shunga yarasha ruhlantira olsa, demak kurash yanada qizg'in kechadi. Bundan tashqari, "Paxtakor" tarkibiga kelib qo'shilgan legionerlar ham qanchalik darajada kuchli ekanliklarini mana shu o'yinda ko'rsatishlari kerak. 

CHetdan qaraganda "Lokomotiv"ning ikkinchi davradagi o'yini kuchsizlangandek ko'rinmoqda. Lekin bu aldamchi taassurot bo'lishi ham mumkin. Masalan, "Loko" bugun zafar quchsa navbatdagi chempionlik uchun yana bir katta qadam tashlaydi. Jamoa tarkibida yo'qotishlar bor, xususan Marat Bikmaev, SHuhrat Muhammadiev va Sadriddin Abdullaev turli sabablarga ko'ra ushbu uchrashuvni o'tkazib yuborishadi.