Bu yil oliy ligada safarda eng uzoq mag'lubiyatsiz seriyani davom ettirgan jamoa qaysi?

Kuz kelib, sovuq tushgach jamoalar ham "jo'jalarni sanash"ni boshlashadi. Albatta, hozircha chempion kim bo'lishini aytish mushkul. Ammo chempionat oxirigacha oltin medallar uchun qizg'in kurash kechsa ajab emas. 

SHu o'rinda raqamlarga murojaat qilgan holda ushbu mavsum safar o'yinlarida mag'lubiyatsiz seriyani eng uzoq davom ettirgan klublarni aniqladik. Ko'pchilik o'ylashi mumkin, bu hoynahoy "Lokomotiv" bo'lsa kerak deb. Yo'q, "Loko" emas ekan. Safar bellashuvlarida eng uzoq mag'lubiyatsiz seriyani davom ettirgan jamoa bu - "Qo'qon-1912" bo'lib, qo'qonliklar safardagi oltinchi o'yinga kelibgina mag'lub bo'lishgan. Jamoa Toshkentda "Bunyodkor"ga 1:2 hisobida o'yinni boy bergan. 

Bu borada ikkinchi o'rinni "Bunyodkor" egallab turibdi. "Qaldirg'ochlar"ning safardagi mag'lubiyatsiz seriyasi to'rtinchi o'yinga kelib o'z intihosini topgan. "Bunyodkor"ni o'z maydonida "Mashal" 1:0 hisobida mag'lubiyatga uchratgan. Uchinchi o'rin esa "Dinamo"ga tegishli. Samarqandliklar safardagi uchinchi bahsda birinchi mag'lubiyatni qabul qilib olishgan. "Dinamo" 5-turda Qo'qondan mag'lubiyat bilan qaytgan. 

Oliy liganing 9ta klubi esa safardagi birinchi o'yinidayoq mag'lub bo'lgan. Bular - "Buxoro", "Qizilqum", "Metallurg", "SHo'rtan", "So'g'diyona", "Neftchi", "Olmaliq", "Obod" va "Navbahor".