Bugun futbol. "Nasaf" - "Qizilqum"

Qarshida "Nasaf" Navoiyning "Qizilqum" klubini qabul qiladi. Turnir jadvalida "Nasaf" 41 ochko bilan ikkinchi o'rinda bormoqda, "Qizilqum" esa 27 ochko jamg'argan holda 11-o'rinni egallab turibdi. 

Fakt: "Nasaf" uy uchrashuvlarida shu paytgacha 9 marta g'alaba qozonib, faqat bitta bellashuvda mag'lub bo'lgan. Qarshiliklar o'z maydonlarida "Bunyodkor"ga yutqazib qo'yishgan. Bundan tashqari, "Nasaf" uydagi o'yinlarda faqat ikkita gol o'tkazib yuborgan. 

Bilasizmi? "Nasaf" ikkinchi davraning oxirgi to'rtta bahsini ketma-ket to'rt g'alaba bilan yakunladi. SHu g'alabalarning ikkitasi uyda, yana ikkitasi safardagi bahslarda qo'lga kiritildi. 

Esingizda bo'lsa, Navoiyda kechgan birinchi davra uchrashuvida tomonlar 1:1 hisobida durangga imzo chekishgandi. Bugungi o'yin qanday yakun topishini esa bahs nihoyasida bilib olamiz. 

Fakt: "Qizilqum" safarda shu paytgacha 9 ochkoli bo'lgan. Jamoa ikkita o'yinda g'alabaga erishgan. Ikkala g'alaba ham birinchi davrada qo'lga kiritilgan. Toshkentda "Bunyodkor" hamda Samarqandda "Dinamo" klublari bir xil 1:0 hisobida mag'lub etilgan. 

Bilasizmi? Ikkinchi davrada "Qizilqum" faqat bitta bellashuvda g'alaba qozondi. Jamoa o'z maydonida "Qo'qon-1912"dan ustun keldi. Oxirgi uch o'yin esa ketma-ket durang bilan yakun topdi. "Qizilqum" safardagi oxirgi o'yinida "So'g'diyona" bilan 1:1 o'ynadi.