Bugun futbol. "Olmaliq" - "Neftchi"

"Olmaliq" o'z maydonida "Neftchi"ni qabul qiladi. "Olmaliq" hisobida 32 ochko bor va jamoa 9-o'rinni egallab turibdi. "Neftchi" esa 14 ochko jamg'argan holda 15-o'rindan mustahkam joy egallagan. 

"Olmaliq"ning o'yinida birinchi davraga nisbatan pasayish yuzaga kelgandek. Buni raqamlar ham ko'rsatib turibdi. "Olmaliq" birinchi davrada qatorasida 11ta o'yinda yutqazmagandi. Ikkinchi davrada esa jamoa ettita o'yindan uchtasida yutqazishga ulgurdi. 

Bilasizmi? "Olmaliq" o'z maydonidagi uchrashuvlarda olti bor g'alaba qozongan va to'rt marta durang o'ynagan. SHuningdek, faqat bir marta mag'lub bo'lgan. Bu jamoa o'z uyida negadir kam gol uradi. 11ta o'yinda 11ta gol. 

"Neftchi" esa hamon g'alabasiz seriyani davom ettirmoqda. Farg'onalik muxlislar "Neftchi" Abramov boshchiligida qachon ilk g'alabasini qo'lga kiritarkin deya kutaverib zerikib qolishdi. 

Fakt: "Neftchi" safardagi birinchi va hozirgacha oxirgi bo'lib turgan g'alabasini 7-turda qo'lga kiritgan. Jamoa Jizzaxda "So'g'diyona"ni 1:0 hisobida mag'lub etib qaytgan.