Ro'ziqul Berdiev: “Qizilqum” jamoasi yildan - yilga kuchayib ketayapti”

-So'zim boshida barcha ustozlarimizni va murabbiylarimizni bayramlari bilan samimiy tabriklayman. Menga ham juda ko'p aziz insonlar ustozlik qilgan. Ularning mehnatini hech qachon unutmayman.

 Bugungi uchrashuvda qadrdon futbolchilarimizni ko'rishib, ko'pchilik xursand bo'lgan bo'lsa ajab emas. Go'yoki bugun ikkiga bo'linib o'ynagandek bo'ldik (kulib). “Qizilqum” jamoasi bugun ham bizga munosib qarshilik ko'rsatdi. Jamoa katta tajribaga ega jamoa. Etirof etish kerak, “Qizilqum” jamoasi yildan-yilga kuchayib borayapti. O'yinlari juda mazmunli bo'layapti. SHuning uchun bugun bizga juda qiyin bo'ldi.

Endi jamoamiz o'yiniga to'xtaladigan bo'lsam, bugun katta mehnat evaziga maydonda ustunlikka erishdik. O'yinda hisob yirikroq ham bo'lishi mumkin edi, ammo vaziyatlardan to'liq foydalana olmadik.  Eng asosiysi g'alaba qozondik. Maqsadimiz ko'proq ochko jamg'arish.

Albatta o'z o'rnida etirof etishim kerak. Bugun “Qizilqum” jamoasi safida ko'pgina sobiq o'yinchilarimiz harakat qilishdi. Ularning klubimiz yutuqlariga qo'shgan hissalari juda salmoqli. Buning uchun biz ulardan doimo minnatdormiz, ularning mehnatini doimo qadrlaymiz.

Ilhom SHomurodov? Men shaxsan Ilhom bilan doimo aloqadaman. Afsuski, uning sog'ligidagi muammo futbolga qaytishiga halaqit berayapti. Ammo oldingi holatiga nisbatan, hozirgi holati ancha yaxshi. Bu aziz futbolchimizni tezroq sog'ayib, safga qaytishini umid qilib qolaman.