Abramovga 11ta o'yin kerak bo'ldi

Oliy liganing 23-turida farg'onaliklar "Olmaliq" mehmoni bo'lib, 2:1 hisobida zafar quchishdi. O'yinda Muzaffar Muzaffarovning ikkita goli farg'onaliklarga ushbu mavsum hisobidan uchinchi g'alabani taqdim etdi. 

Bungacha "Neftchi" o'z maydonida "Obod"ni va safarda "So'g'diyona"ni mag'lub etgandi. Lekin bu ikkala g'alaba Andrey Fyodorov davrida qo'lga kiritilgandi. Jamoaga Vadim Abramov bosh murabbiy bo'lganidan keyin esa "Neftchi" "Olmaliq" bilan kechgan bahsda ilk g'alabasini nishonladi. 

Buning uchun Vadim Karlenovichga 11ta o'yin kerak bo'ldi. Avvalgi o'nta bahsning oltitasida farg'onaliklar yutqazib, to'rt marta durang qayd etishgandi. Darvoqe, "Neftchi" ikkinchi davra boshlanganidan beri birinchi bor raqib darvozasiga bittadan ko'p to'p kirita oldi.