Jamoasini ECHL guruh bosqichiga olib chiqqan 5 azamat FOTO

Uning yakuniga ko'ra beshta jamoa ECHL guruh bosqichiga yo'l olgan bo'lsa, mag'lub bo'lgan besh jamoa Evropa ligasida ishtirok etadigan bo'ldi.

Biz pley-off o'yinlarida o'zini ko'rsatib jamoasining g'alabalariga xissa qo'shgan besh nafar futbolchini tanlab oldik.


Xorvatiya chempioni Zagrebning "Dinamo" klubi pley-offda Albaniya chempioni "Skenderbeu"ga qarshi o'ynadi. Ilk uchrashuvda safarda g'olib bo'lgan "Dinamo"ning keyingi bosqichga chiqish imkoniyati oshib ketgandi. Javob o'yinida Xorvatiya klubi 4:1 hisobida zafar quchdi.

Jazoirlik Al Arbi Hilol Sudani ikkita o'yinda 3ta gol urdi. 27 yoshli hujumchi "Dinamo"ning ikki yillik tanaffusdan so'ng yana ECHL guruh bosqichida o'ynashini taminladi.

"DINAMO ZAGREB" (Xorvatiya) - "Skenderbeu Korche" (Albaniya) 4:1 (birinchi o'yin 2:1)

Qahramon - Al Arbi Hilol Sudani

SHveciyaning "Malme" klubi pley-offda SHotlandiya chempioni "Seltik" qarshiligini engishga erishdi. Skandinaviya klubi ilk o'yinni SHotlandiyada o'tkazib 2:3 hisobida yutqazdi. O'sha uchrashuvda "Malme"ning ikkala goliga Yo Inge Berget mualliflik qilgandi. Kechagi javob bahsida shveciyaliklar 2:0 hisobida zafar quchishdi va guruh bosqichiga yo'l olishdi. Qahramon sifatida aynan ilk o'yinda ikkita to'p kiritgan Yo Inge Bergetni tanlashga qaror qildik. Qizig'i o'tgan mavsumni bu futbolchi aynan "Seltik" safida o'tkazgandi...


"MALME" (SHveciya) - "Seltik" (SHotlandiya) 2:0 (birinchi o'yin 2:3)

Qahramon - Yo Inge Berget

Isroilning "Makkabi" klubi pley-off bosqichida o'z yurishini to'xtatishini ko'pchilik taxmin qilgandi. Sababi raqib SHveycariyaning "Bazel" klubi edi. Biroq ilk o'yinni safarda o'tkazgan Tel-Aviv klubi 2:2 hisobida durang bilan uyiga qaytdi. O'z maydonida esa 1:1 hisobini qayd etib 10 yillik tanaffusdan so'ng yana ECHL guruh bosqichida o'ynash huquqini qo'lga kiritdi.

Qizig'i ushbu o'yinlarda "Makkabi"ning uchala golini ham jamoa sardori Eran Zahavi kiritdi. Haqli ravishda aynan uni qahramon sifatida tan oldik.

"MAKKABI TEL-AVIV" (Isroil) - "Bazel" (SHveycariya) 1:1 (birinchi o'yin 2:2)

Qahramon - Eran Zahavi

Ukrainaning "SHaxtyor" klubi qiyinchilik bilan guruh bosqichiga yo'l oldi. Safardagi dastlabki o'yinda Marlosning yagona goli Mircha Luchesku shogirdlariga g'alaba keltirgandi. Javob bahsida 2:2 hisobi qayd etildi. Bu o'yinda ham iyul oyida "Metallist"dan sotib olingan Marlos bitta gol urdi va jamoasining guruh bosqichiga yo'l olishida katta xissa qo'shdi.

"SHAXTYOR" (Ukraina) - "Rapid" (Avstriya) 2:2 (birinchi o'yin 1:0)

Qahramon - Marlos

Franciyaning "Monako" klubi o'tgan mavsum ECHL chorak finaliga qadar etib borgan edi. Yangi mavsumda esa bu jamoa Evropa ligasida ishtirok etadi. Sababi monegasklar pley-offda Ispaniyaning "Valensiya" klubiga ikki o'yin natijasiga ko'ra imkoniyatni boy berib qo'yishdi. Ispaniyada o'tgan dastlabki o'yinda "ko'rshapalaklar" 3:1 hisobida zafar quchishgandi. Kechagi javob bahsida esa "Monako" 2:1 hisobida g'olib bo'ldi. "Valensiya" guruh bosqichida ishtirok etadigan Ispaniyaning beshinchi jamoasiga aylandi. Birinchi o'yinda gol urgan va golli pas oshirgan Sofyan Feguli ikkinchi bahsda ham faol o'ynadi.

"Monako" (Franciya) - "VALENSIYA" (Ispaniya) 2:1 (birinchi o'yin 1:3)

Qahramon - Sofyan Feguli

Narzulla Saydullaev tayyorladi