"A" guruhi peshqadami Angliyaning "Manchester Yunayted" klubi Portugaliyada "Benfika" mehmoni bo'ldi. Uchrashuvning 64 daqiqasida Markus Reshfordning jarimadan kiritgan goli Joze Mourino shogirdlariga uchinchi turda ham g'alaba keltirdi. Reshfordning golida hamma aybni "Benfika" darvozaboni Mile Svilar o'z bo'yniga olsa bo'laveradi. 18 yoshli kiper uzoq masofadan amalga oshirilgan va bir qarashda uncha xavfli ko'rinmagan jarima zarbasidan gol o'tkazib yubordi. Yani, Svilar to'p jarima maydonchasiga uzatib beriladi degan hayol bilan oldinroqqa chiqib bordi, Markus esa to'pni to'g'ri darvozaga yo'lladi. Yosh darvozabon to'pga etib bordi, lekin uni ushlab olishga uringan holda to'pga qo'shilib darvozaga kirib ketdi.
Afsuski, 18 yoshli Mile Svilarning qo'pol xatosi jamoasiga qimmatga tushdi.
To'pni darvoza chizig'ini to'liq kesib o'tgan edi.
Mile xatosi sabab gol o'tkazib yuborganidan keyin jamoadoshlari va muxlislardan uzr so'radi.
Uchrashuv o'z yakuniga etganidan so'ng "Manchester Yunayted" yulduzlari Mile Svilarni yupatishga urinishdi.
Yulduzlarning bunday harakati 18 yoshida ECHLda debyut qilib rekord qo'ygan kiperning sinib qolmasligiga yordam bersa ajab emas.
Lukaku avvalo raqibini borib yupatishga urindi, unga bir nimalar dedi. Bu holat bizga terma jamoamizning Janubiy Koreyaga qarshi o'yinidan keyingi holatni eslatib yubordi. O'shanda Son Xyon Min Jahon chempionatiga chiqqanini nishonlashdan oldin Odil Ahmedov, Aleksandr Geynrix va Otabek SHukurovlarni yupatgan edi. Ayniqsa, Odilga uzoq vaqt nimalardir degan edi.
Svilar uchun bunday o'yindan keyin futbol yulduzlarining qo'llab-quvvatlashini his etish juda muhim.
"Benfika" darvozabonini jamoadoshlari ham yupatishga urinishdi.
Keyingi o'yinlarda ruhan o'zini o'nglab olgan Mile Svilarni ko'rishni xohlardik, balki mana shu o'yin va xato uning kelajagi uchun juda katta foyda bo'lar...
GettyImages suratlari yordamida Tolibjon Qosimov tayyorladi.
Bosh sahifaga
2135