Bugun shubhasiz Buxoroda juda qiziqarli bahs kechishi kutilmoqda. CHunki ikkinchi o'rin uchun kurashayotgan "Paxtakor" uchun bu nihoyatda muhim uchrashuv hisoblanadi. "Nasaf"ning kechagi g'alabasidan keyin bugun "Paxtakor" ham faqat g'alabani ko'zlab maydonga tushishi turgan gap, biroq "Buxoro" ancha jiddiy raqib.
Bilamizki, "Buxoro" o'z maydonida ancha yaxshi futbol namoyish etadi, qolaversa, stadionga ko'plab muxlislar tashrif buyurishadi. Bugungi bellashuvga ham 10 mingdan ziyod ishqiboz tashrif buyurishi kutilmoqda.
"Buxoro" ikkinchi davrani yaxshi o'tkazyapti deya olamiz. SHunday bo'ldiki, jamoa qatorasiga to'rtta o'yinda g'alaba qozonib, jadvalda hatto ikkinchi o'ringacha ko'tarilib oldi. Ammo ketma-ket uchta durang "Buxoro"ni beshinchi o'ringa "mixlab" qo'ydi. "Paxtakor" esa SHota Arveladze qo'l ostiga o'tgach, birin-ketin o'z ochkolarini yig'a boshladi.
Bilasizmi? "Buxoro" ikkinchi davrada hali mag'lubiyatga uchramadi. Jamoa hisobida beshta g'alaba va to'rtta durang bor. "Paxtakor" esa bir marta yutqazib qo'ydi. Safarda "Buxoro" bilan 3:3 o'ynab qaytgan "Navbahor" o'z maydonida "Paxtakor"ni mag'lub eta oldi. Umuman olganda, "Paxtakor" ikkinchi davrada beshta o'yinni safarda o'tkazgan bo'lsa, shundan ikkitasida g'alabaga erishib, ikki bor durang o'ynadi va bitta uchrashuvda mag'lub bo'ldi.
Fakt: "Paxtakor" yil boshidan beri safarda faqat uchta o'yinda g'alaba erishgan. Jamoa "Obod", "Metallurg" va "Lokomotiv"dan ustun kelgan.
Bosh sahifaga
190