Qura natijasiga ko'ra, O'zbekiston U-23 termasi “A” guruhidan joy oldi. Guruh bosqichida jamoa Xitoy, Qatar va Ummon bilan kuch sinashadigan bo'ldi.
O'zbekiston U-23 terma jamoasi bosh murabbiyi Ravshan Haydarov qura natijasi, jamoalar salohiyati va guruhdagi vaziyat haqida o'z fikrlarini bildirib o'tdi.
“Xitoy terma jamoasining mezbon sifatida ishtirok etishini hisobga olmasa, guruhda saviya jihatidan teng jamoalar yig'ildi, deyish mumkin”, – dedi Ravshan Haydarov O'FF matbuot xizmatiga. “Xitoy va Qatar yoshlari bilan o'rtoqlik uchrashuvlarida maydonga tushdik va ularning qanday salohiyatga ega jamoa ekanligini bilamiz. Ummon esa saralash bahslarida Eron guruhda qoldirib, Osiyo chempionati final bosqichiga chiqa oldi. Bu ham ularning kuchli jamoa ekanligidan dalolatdir”.
“Umuman olganda, musobaqada har jihatdan teng kuchga ega jamoalar ishtirok etadi va ularning imkoniyatlarini deyarli bir xil. Barchasi jamoalarning musobaqaga qanday kayfiyatda va qay tarzda tayyorgarlik bilan kelishiga bog'liq. Bu yoshdagi terma jamoalar orasida kimnidir favorit yoki aksincha autsayder deyish mushkul. Ushbu musobaqa juda ko'p futbolchilar uchun milliy terma jamoaga tramplin sifatida xizmat qiladi. Bizning terma jamoa futbolchilari uchun ham musobaqa juda muhim ahamiyat kasb etadi. Aynan shu musobaqa orqali ular milliy terma jamoaga munosib ekanliklarini isbotlashga harakat qilishadi”.
Malumot uchun, U-23 Osiyo chempionati 2018 yilning 8–27 yanvar kunlari Xitoyda bo'lib o'tadi. Ravshan Haydarov bosh murabbiyligidagi O'zbekiston U-23 terma jamoasi BAAda bo'lib o'tgan saralash bosqichi “D” guruhida 1-o'rinni egallagan holda Xitoydagi Osiyo chempionati–2018 musobaqasiga yo'llanmani qo'lga kiritgandi.
Bosh sahifaga
373