Bunga qadar poytaxt jamoasining yaqqol autsayder maqomida bo'lib turgani undan yuqoriroqdagilarni biroz xotirjam qilib qo'ygandi. Xavfli zonaga yaqin klublardan biri So'g'diyona ham endi bor etiborini kuchlilar safidagi o'rnini saqlab qolishga qaratadi.
Igor SHkvirin shogirdlari hali elitadagi propiskalarini rasman cho'zdirishgani yo'q. Biz navbatdagi tur oldidan Jizzax jamoasi hujumchisi Ixtiyor Toshpo'latov bilan suhbat uyushtirdik.
- Ixtiyor, So'g'diyona mavsumni omadsiz o'tkazyapti. Klubda buning sabablari muhokama qilinyaptimi?
- Haqiqatan ham, joriy yil jamoamiz ko'ngildagidek o'yin namo-yish eta olmayapti. Buning natijasida turnir jadvalidagi holatimiz havas qilmaydigan darajaga kelib qoldi. Har bir uchrashuvdan keyin siz aytgan muhokamalar bo'ladi. Yo'l qo'yilgan xato va kamchiliklar tahlil qilinadi.
- O'sha muhokamalarda mag'lubiyat va duranglarning sabablari o'rganilyaptimi?
- Albatta, murabbiylar har bir detalga to'xtalishadi. Hamma ayb o'zimizda. Yuzaga keltirilayotgan qulay vaziyatlarni golga aylantira olmayapmiz.
- Mavsumni Davron Fayziev bilan boshlab, Igor SHkvirin boshchiligida davom ettiryapsizlar. Bu murabbiyning futbol falsafasi qanday ekan?
- Igor Anatolevich ko'proq paslar yordamida o'yin tashkil etishga etibor qaratadi. SHuningdek, futbolchilardan to'pni nazorat qilish va jamoadoshiga aniq etkazib berishni talab qiladi.
- Futbolchilar qisqa fursatda yangi talablarga moslashib olishdimi?
- Ha, hammasi joyida, ko'nikdik.
- Maosh masalasida muammo yo'qmi?
- Vaqtida bo'lmasa ham berib turishibdi.
- SHu jihat ham jamoaning o'yiniga salbiy tasir o'tkazmayaptimikan?
- Agar maoshlar vaqtida berib turilsa, futbolchilar maydonga yuqori kayfiyatda tushishadi. SHaxsan men o'yinga unchalik tasiri o'tkazmasa kerak, deb o'ylayman.
- Obodning oliy ligadan chetlatilganiga munosabatingiz qanday?
- To'g'risi, bundan biroz ranjidim. CHunki jamoada istedodli yoshlar bor edi. Mavsum yakuniga etayotgan bir pallada ular endi qaerda to'p surishadi?
- PFLning qarori to'g'ri bo'ldimi yoki jamoani istisno tariqasida mavsum oxirigacha oliy ligada qoldirish kerakmidi?
- Menimcha, shunday yo'l tutishsa, ziyon qilmasdi. Lekin PFL qaror chiqarib bo'ldi, endi uni hech kim o'zgartira olmaydi.
- So'g'diyona hali xavfli zonani tark etib ulgurgani yo'q. Jamoa kuchlilar safida qolishni uddalay oladimi?
- Nasib qilsa, albatta, qolamiz. SHunga intilyapmiz.
- SHartnomangiz muddati qachon yakunlanadi?
- SHu yilning dekabr oyida.
- Sizni kelasi mavsum boshqa jamoada ko'rib qolsak, bundan ajablanmaymiz...
- Takliflar bo'lsa, ularni ko'rib chiqishga tayyorman. Lekin hozir bor etiborim So'g'diyonaning o'yinlariga qaratilgan. Qolgan uchrashuvlarda ijobiy natijaga erishib, kuchlilar safidagi o'rnimizni saqlashimiz lozim.
- Faoliyatingiz davomida sizga kelishilgan o'yinlarda ishtirok etish taklifini berishganmi?
- Yo'q, bunday holatlar bo'lmagan. Taklif tushsa ham, javobim tayin. SHuni ishonch bilan ayta olamanki, hozirgacha kelishilgan o'yinlarda umuman ishtirok etmaganman.
- Oliy ligada siz to'p suradigan ampluadagi eng kuchli futbolchilar sifatida kimlarni aytgan bo'lardingiz?
- Lokomotivdan Marat Bikmaev, Nasafdan Dragan CHeran, o'zimizdan esa Sanjar Rashidov.
malumot uchun
IXTIYOR TOSHPO'LATOV
Ampluasi: hujumchi
Klubi: So'g'diyona
Tahsil olgan joyi: Yangier futbol internati
Birinchi murabbiylari: Ergash SHeraliev, Behzod Muhiddinov
Ilk professional klubi: Mashal
Havas qiladigan futbolchisi: Krishtianu Ronaldu
Muxlislik qiladigan jamoasi: Real Madrid
Yaxshi ko'rgan taomi: palov
Yoqtirgan avtomobil rusumi: Kaptiva
Bosh sahifaga
213
