O'zbekiston terma jamoasida o'ynagan qoraqalpog'istonlik futbolchilarni bilasizmi?

Quyida ana shu futbolchilarning ko'rsatkichlari haqida to'xtalib o'tamiz.

1. Berdax Allaniyazov. 8 o'yin
Allaniyazov 1992 yili Qirg'iziston bilan uchrashuvda termadagi ilk o'yinini o'tkazib, o'z darvozasi dahlsizligini saqlab qoldi. Umuman olganda posbon o'sha yili 4 uchrashuvda 4 ta gol qo'yib yubordi. 1994 yil ham Berdax 4 ta o'yinda darvozani qo'riqlab, 3 ta bahsni "quruq" o'tkazib, termaning Osiyo o'yinlaridagi muvaffaqiyatiga o'z hissasini qo'sha oldi.

2. Nematulla Qutibaev. 14 o'yin - 5 gol
Qutibaev terma jamoadagi debyutini 1998 yili Hindistonga qarshi kechgan o'rtoqlik uchrashuvida nishonlagan. 0:0 hisobi qayd etilgan o'yinda u to'liq 90 daqiqa harakat qilgan. Nematulla oradan 3 kun o'tib Hindistonga qarshi kechgan takroriy o'rtoqlik uchrashuvida termadagi ilk golini urdi. U termadagi uchinchi o'yinini Osiyo o'yinlari doirasida Mo'g'ulistonga qarshi o'tkazib "xet-trik"ka erishdi. SHuningdek Turkmanistonga qarshi kechgan dramatik o'yinda gol urib, termamizga bir ochko taqdim qildi. Dastlabki 5 o'yinda 5 ta gol urgan hujumchi, shundan keyingi 9 ta uchrashuvda birorta ham gol ura olmadi. Qutibaev termadagi so'ngi o'yinini 2002 yili Slovakiyaga qarshi o'rtoqlik uchrashuvida o'tkazdi.

3. Navro'z Alimov. 11 o'yin - 2 gol
Navro'z 2014 yili Toshkentda Ummonga qarshi kechgan to'qnashuvda termada debyut qildi. U milliy jamoa libosidagi dastlabki 7 ta o'yinda birorta ham gol urmadi. Keyinchalik BAAga qarshi o'yinda ilk golini urgan bo'lsa, Iordaniya bilan to'qnashuvda ikkinchi goliga mualliflik qildi. 2014 yil davomida o'rtoqlik uchrashuvlarida 11 uchrashuvda 2 ta gol urgan hujumchi 2015 yili "Paxtakor"ga yo'l oldi va shundan so'ng termada chaqirilmadi. Boz ustiga uning faoliyatida pasayishlar davri bsohlandi.

4. Salamat Qutibaev. 3 o'yin
Salamat 2016 yildan buyon muntazam ravishda terma jamoaga jalb etilib kelinmoqda. Biroq ko'pincha u o'yinlarni zaxirda o'tirib tomosha qilishiga to'g'ri keldi. SHunga qaramay Babayan Qutibaevni 3 marta zaxiradan o'yinga tushdirdi. Yarim himoyachi debyut uchrashuvini Kanadaga qarshi o'tkazdi. SHundan so'ng u Burkina-Faso va Gruziya termalari bilan o'yinlarda ham zaxirdan o'yinga qo'shildi. Etiborli jihati Salamat 3 ta o'yinni 3 ta qita vakiliga qarshi o'tkazdi va Osiyo jamoalari bilan o'yinlarda maydonga tushmadi.

Furqat Yusupov tayyorladi