Xabaringiz bor, dastlabki uchrashuvda 0:0 hisobi qayd etilgan va endi Sidneyda bo'ladigan javob bahsidan oldin Avstraliya yaxshi imkoniyatga ega.
Jamoa etakchisi Tim Keyxill OAVga bergan intervyusida javob o'yiniga tayyor ekanini aytib o'tdi. Malumki, u jarohat sabab birinchi o'yinda ishtirok eta olmagandi. Ertaga esa Avstraliya jahon chempionatiga borish masalasini hal qiladi. O'yin bizning vaqt bilan 14:00da boshlanadi.
Keyingi yil Rossiyada bo'lib o'tadigan jahon chempionatiga chiqish Tim Keyxill uchun oxirgi imkoniyat va buni hujumchining o'zi ham his qilib turibdi. Agar Avstraliya mundialga yo'l ola bilmasa, xuddi Italiyada Buffon qilgani kabi Keyxill ham terma jamoa bilan xayrlashishi mumkin.
37 yoshli hujumchi ertangi muhim bahs oldidan shunday dedi:
"Men Gondurasda mashg'ulot o'tkazdim, lekin tizzamdagi og'riq bezovta qilib ertasi kun maydonga tusha olmadim. Eng muhimi, u erda yutqazib qo'ymadik va o'z darvozamiz daxlsizligini saqlab qoldik. To'g'ri, maydon yaxshi holatda emasdi, umuman ikkala jamoa ham bir xil sharoitda o'ynadi".
"Safarda 0:0 yaxshi, lekin vazifa hali bajarilgani yo'q. Oldinda bizni javob bahsi kutmoqda va bunda bor imkoniyatni ishga solamiz. Terma jamoadan menda ko'plab yaxshi xotiralar qolgan. Agar jahon chempionatiga chiqsak, bunday xotiralar yana ko'payadi. Men ertangi bahsga tayyorman va g'olib bo'lib Vatanimiz bayrog'ini ko'targan holda stadion bo'ylab yugurishni xohlayman. Umid qilamanki, Avstraliya ketma-ket to'rtinchi marta jahon chempionatiga chiqadi".
Bosh sahifaga
132