Qashqadaryodan muxbirimiz xabar qiladi, bugun Qarshida "jang" bo'ladi

Xabaringiz bor, ayni paytda saytimizning uch nafar xodimi Qarshi shahrida ijodiy safar bilan bo'lib turibdi. Kecha ikkala jamoa ham o'yinoldi yakuniy mashg'ulotini o'tkazdi. Muxbirimiz SHahboz Beg'amovning aytishicha, jamoalar o'yinga tayyor va bugun Qarshida "jang" kechishi kutilmoqda. Aslida shunday bo'lishi ham kerak, axir o'rtaga OCHL yo'llanmasi tikilgan.

Bu o'yinda hech bir jamoani durang qoniqtirmaydi, ikkala klub ham g'alaba uchun maydonga tushadi. Xususan "Nasaf" uchun bugungi bellashuv alohida ahamiyat kasb etadi. CHunki jamoa o'z tarixida ilk marta kumush medallarga ega chiqishga juda yaqin turibdi. O'z navbatida "Paxtakor" uchun ham bu oddiy o'yin emas. Agar jamoa SHota Arveladze qo'l ostida OCHLga yo'l ola bilmasa, keyinchalik ko'plab tanqidiy fikrlar ostida qolib ketishi mumkin.

Xullas, ikkala jamoa ham bugungi to'qnashuvga tayyor. Biz esa ham "Nasaf", ham "Paxtakor"dan chiroyli, shiddatli, shu bilan birga mazmunli o'yin kutib qolamiz. Ayni paytda Qarshida bo'lib turgan futbol ixlosmandlarini soat 14:00da boshlanadigan muhim bellashuvga chorlaymiz.  Stadionga bora olmaydiganlar esa mazkur bahsni "Sport" telekanali to'g'ridan-to'g'ri kuzatish imkoniyatiga egalar.

Yakunda ikkinchi o'rinni kim olmasin, biz bugun faqat chiroyli o'yin kutib qolamiz. O'ylaymizki, hakamlar ham o'yinni adolatli tarzda boshqarib, o'z shanilariga dog' tushirishmaydi. Uchrashuv boshlanishiga sanoqli soatlar qolmoqda, kelinglar hammamiz shiddatli futbol guvohiga aylanaylik.