SHu tariqa "Lokomotiv" o'z tarixida qatorasiga ikkinchi bor chempionlikni nishonladi. Albatta, mavsum tugashiga hali bitta tur bor, shu bois "Loko" uchun oxirgi tur ham muhim ahamiyatga ega bo'ladi. CHunki jamoa o'z maydonida "Bunyodkor"ni qabul qiladi.
Qizig'i shundaki, "Lokomotiv" o'tgan yil ham muddatidan oldin chempionlikni nishonlagandi va oxirgi turda aynan "Bunyodkor" bilan o'ynagandi. Jamoa chempion bo'lganiga qaramay, "Bunyodkor"ni 1:0 hisobida mag'lub etishning uddasidan chiqqandi. Bu safar o'yin qanday tugashini esa vaqt ko'rsatadi.
Albatta, "Loko" oxirgi turda ham g'alaba uchun maydonga tushishi turgan gap, negaki jamoa chempionlikni o'z stadionida, muxlislari qarshisida nishonlashni xohlaydi. Ana endi o'tgan yil va bu yilni solishtirib, bazi raqamlarni keltirib o'tsak.
"Loko" o'tgan yil 30ta o'yinning 23tasida zafar quchib, besh bor durang o'ynagan, shuningdek ikki uchrashuvda mag'lub bo'lgandi. Jamoa jami 74 ochko to'plagandi. "Temiryo'lchilar"ning ikkita mag'lubiyati safarda "Paxtakor" va "Buxoro" bilan uchrashuvlarda ro'y bergan. Ikkala bahs ham bir xil 1:2 hisobida yakun topgan.
Lekin bu yil jamoa o'tgan yilgi raqamlarni takrorlay olmadi. CHunki "Loko" oxirgi uchrashuvni yutgan taqdirda ham ochkolari soni 70ta bo'lib qoladi, bu esa o'tgan yilgidan to'rtta kam. Jamoa avvalgi mavsumda 77ta gol urgan bo'lsa, bu yilgi ko'rsatkich 64 bo'lib turibdi.
"Lokomotiv" o'tgan yil o'z maydonidagi uchrashuvlarda mag'lub bo'lmagandi. Lekin bu mavsum jamoa "Paxtakor"ga yutqazib qo'ydi. SHuningdek, "Loko" safarda uch bor mag'lub bo'ldi: "SHo'rtan", "Nasaf" va "Bunyodkor" klublariga. Qizig'i shundaki, "Loko" yutqazgan o'yinlarida birortayam to'p kirita olmadi.
Qaysi "Lokomotiv" kuchli? O'tgan yilgimi yo bu yilgimi? Bu savolga birdaniga javob berish qiyin. CHunki jamoa qanday holatda bo'lmasin, baribir chempionlikni qo'lga kiritdi. Futbolda esa g'oliblar muhokama qilinmaydi degan gap bor. Ammo Osiyo chempionlar ligasidagi ishtirokdan kelib chiqadigan bo'lsak, o'tgan yilgi jamoa ancha kuchli edi. CHunki o'tgan yil "Loko" qiyin guruhdan chiqish bilan birga chorak finalga qadar etib kelgandi. Bu yil esa jamoa guruhdan chiqa olmadi.
Nima bo'lgan taqdirda ham, "Lokomotiv" - 2017 yilgi futbol mavsumi bo'yicha O'zbekiston chempioni! Biz saytimiz nomidan ushbu yutuq bilan barcha "Lokomotivchilar"ni, "O'zbekiston Temir yo'llari" AJ xodimlarini, shuningdek, klubning ashaddiy muxlislarini tabriklab qolamiz.
Bosh sahifaga
172