Quyida nukusliklarning Oliydagi eng qiyin 5 ta raqibi haqida to'xtalib o'tamiz.
5. "Surxon". 8 o'yin. 2 g'alaba, 1 durang, 5 mag'lubiyat. To'plar nisbati 11:18
"Orol" "Surxon" bilan 8 marta to'qnash kelib, 5 ta bellashuvda imkoniyatni boy bergan. Nukusliklar 3 ta o'yinda 1:4 hisobidan yutqazgani ham Termizliklarning naqadar murakkab raqib bo'lishganidan dalolat beradi. Qoraqalpog'istonliklar Surxondaryo viloyati jamoasi bilan kechgan so'ngi 4 ta o'yinning barchasida taslim bo'lishgan.
4. "Do'stlik". 8 o'yin. 1 g'alaba, 1 durang, 6 mag'lubiyat. To'plar nisbati 10:22
Nukusliklar Oliy ligada "Do'stlik" bilan 8 marta to'qnash kelib, atigi bir marta g'alaba qozonishgan. Yagona g'alaba jamoalarning 2001 yilgi, yani eng oxirgi o'yinlariga to'g'ri keladi. O'shanda "Turon"da kechgan bellashuvda mezbonlar 4:3 hisobida zafar quchishgan. SHuningdek ilk o'yinda durang qayd etilgan va qolgan 6 ta bahsda Toshkent viloyati jamoasi g'oliblikni tantana qilgan. Nukus jamoasi ikki marta yirik hisobda yutqazganini ham takidlab o'tish joiz.
3. "Navbahor". 10 o'yin. 2 g'alaba, 1 durang, 7 mag'lubiyat. To'plar nisbati 5:27
"Orol" jamoasi "Navbahor" bilan 10 marta uchrashgan. Qiziq tomoni nukusliklar birinchi va oxirgi o'yinda g'alaba qozonishgan. "Navbahor" 7 ta g'alabaning 5 tasini yirik hisobda nishonlagan. Namanganda kechgan ikkita to'qnashuvda esa 6:0 hisobi qayd etilgan. 1994 yili "Navbahor" "Turon" stadionida 4:1 hisobida ustun kelgan.
2. "Buxoro". 10 o'yin. 1 g'alaba, 9 mag'lubiyat. To'plar nisbati 7:34
"Buxoro" "Orol" bilan kechgan 10 o'yinda faqatgina bir marta ochko yo'qotgan. 1994 yili "Turon"da kechgan bellashuvda mezbonlar kichik hisobda ustun kelishgan. Qolgan 9 bellashuv esa Buxoroliklarning g'alabasi bilan yakunlangan. Nukus jamoasi ikki martadan 1:4 va 0:5 hisoblarida, bir marta 1:7 hisobida o'yinni boy berishgan.
1. "Neftchi". 10 o'yin. 10 mag'lubiyat. To'plar nisbati 4:30
Nukusliklarning Oliy ligadagi eng noqulay raqibi "Neftchi" bo'lgan. Farg'onaliklar barcha 10 o'yinda ham "Orol"ni mag'lubiyatga uchratgan. Jamoa 10 o'yinning atigi 3 tasida gol urgan va 5 ta to'qnashuvda yirik hisobda imkoniyatni boy berib qo'ygan. Eng qizig'i "Orol" Oliy ligada ishtirok etgan 5 mavsumning to'rttasida aynan "Neftchi" klubi chempionlikni qo'lga kiritgan.
Furqat Yusupov
Bosh sahifaga
194
