CHunki odamlar xayolida O'FF shu paytgacha go'yoki yopiq tashkilotdek tasavvur uyg'otgan, xuddiki o'z ishlarini ommaga elon qilmasdan sirli tarzda olib borayotgandek edi. SHaffoflik so'zi esa muxlislarga xush yoqib tushdi, shuningdek biz - OAV xodimlarining ham etiborini tortdi. Ana endi hammasi yaxshi bo'ladi, ko'plab savollarga o'rin qolmaydi, bu borada birinchi qadamni O'FF tashladi, biz esa shunchaki yoritib bersak bo'lgani deb o'yladik. To'g'ri, boshida hammasi yaxshi boshlandi. O'FF prezidenti dangal gapirib keldi, klublardan ko'p narsa talab qila boshladi, oshkoralikni maqul ko'rdi, lekin vaqt o'tib hammasi yana oldingi holatga qayta boshladi.
SHaffoflik deganda nima tushunamiz?
SHu o'rinda bir savol tug'iladi: shaffoflik o'zi nima va qanday manolarni beradi? Buning uchun lug'at kitoblariga murojaat qilish shart emas. SHaffof degani oddiy qilib aytganda aniq, tiniq manolarini beradi. Bu so'z biror tashkilotga nisbatan ishlatilsa, o'sha tashkilotning ochiq-oydin, hech narsani bekitmasdan ishlayotganidan darak beradi. Buni O'FF misolida aytadigan bo'lsak, tashkilotning har bir qadami matbuotda yoritib borilishi, amalga oshirilayotgan ishlar keng va atroflicha rasmiy saytda yoritilishi hamda moliyaviy raqamlar ochiq elon qilinishini tushunamiz. Bizning nazdimizda mana shu shaffoflik.
To'g'ri, O'FF boshida bunga amal qilib keldi va bir qator masalalarga oshkoralik bilan yondoshdi. Bir so'z bilan aytganda, Umid Ahmadjonov eng shimarib ishga kirishdi, bir qator davlatlarga bordi, federaciyalar rahbarlari bilan futbol rivoji borasida turli memorandum va loyihalar ustida shartnomalar imzolandi, bu esa futbol ixlosmandlarini xursand qilmay qo'ymadi. Mana endi bizda ham rostakamiga rivojlanish bo'ladi, mana shu memorandum orqali bir nechta o'rtoqlik uchrashuvlari o'tkazamiz deb o'yladik. 14 noyabr kungi BAAga qarshi o'rtoqlik o'yini taxminlarimizni isbotlagandek bo'ldi.
Masalaning ikkinchi tomoni
SHu o'rinda tanganing ikkinchi tomoniga ham nazar solmasak bo'lmaydi. To'g'ri, hozircha hammasi yaxshi ketyapti. O'FF bong urib kelayotgan shaffoflik ko'zga tashlanib qolgandek, ammo ikkinchi tomondan nimagadir faqat ijobiy tomonlar haqida ko'p gapirilyapti, salbiy jihatlarga esa ko'z yumib ketayotgandekmiz. Quruq qoshiq og'iz yirtar deganlaridek, buni misollar tariqasida keltirib berishga harakat qilamiz. Aytaylik, BAA milliy futbol uyushmasi bilan imzolangan memorandum tufayli o'rtoqlik uchrashuvi tashkil qilindi.
Lekin shu o'rinda Qatar, Janubiy Koreya, Yaponiya federaciyalari bilan ham shunday memorandumlar imzolandiki, bundan ko'zlangan maqsad batafsil yoritilmadi. Yani, biz demak bu terma jamoalarga qarshi ham o'rtoqlik o'yini o'tkazamiz, axir memorandum imzolandi-ku deya olamizmi? Bu o'rinda Qatarni ko'ndirish mumkin, ammo jahon chempionatiga chiqqan Janubiy Koreya bilan Yaponiyani ko'ndirish oson kechmaydi. CHunki ular keyingi yil mundialga borishadi va borishdan oldin aynan jahon chempionatiga chiqqan jamoalar bilan o'ynashni reja qilishadi. Ammo bizga ham kuchli raqiblar bilan o'rtoqlik uchrashuvlari kerak. CHunki biz 2019 yilning boshida Osiyo Kubogida ishtirok etamiz va unda terma jamoa oldiga kamida yarim finalga etib borish vazifasi qo'yiladi. Xullas bu tomonlama ham savollar bor.
O'tkazilmagan matbuot anjumanlari
O'zbekiston o'smirlar terma jamoasi va O'zbekiston yoshlar terma jamoasi Osiyo chempionati saralash bahslarida bir xil yomon natija qayd etdi. Afsuski, ikkala yoshdagi jamoamiz ham Osiyo chempionatiga chiqa olmadi va bunaqasi yaqin yillarda ro'y bermagandi. Lekin nima uchundir bu borada O'FF jim turdi, muvaffaqiyatsizlik borasida rasmiy bayonot bermadi. Na murabbiylar bilan matbuot anjumani o'tkazildi, na biror tushuntirish berildi.
O'smirlarimiz bosh murabbiyi Dilshod Nuraliev Saudiya Arabistonidan qaytib kelgach, oradan ko'p o'tmay ishdan olindi va bu haqda ikki qator yozildi. Tojikistonga borib kelgan Aleksandr Mochinovning taqdiri nima bo'ldi? Uni ham ishdan ketdi deya olamizmi? Bir narsa deyish qiyin, chunki O'FF hozircha indagani yo'q. SHu bois biz Mochinov ketgan yoki hamon o'z lavozimida deya aniq gapira olmaymiz. Ammo eng muhimi, nima uchun ular bilan matbuot anjumani o'tkazilmadi, shunga hayronmiz, yoki bo'lmasa anjumanlar faqat yutuqlardan keyin qilinadimi?
Albatta, matbuot anjumanlarini tashkil qilish va o'tkazish tashkilot matbuot kotibining vazifasiga kiradi. Lekin yuqoridan buyruq bo'lmaguncha matbuot kotibining o'z bilganicha ish tutishga haqqi yo'q. CHunki u asosan rahbariyat tomonidan beriladigan tegishli ko'rsatmalar orqali faoliyat yuritadi. SHu bois biz bu o'rinda matbuot kotiblarini ayblay olmaymiz. Agar rahbar o'tkaz desa-yu, lekin kotib ishni paysalga solib yursa bu boshqa gap.
Xullas muvaffaqiyatsizlikka uchragan ikkala murabbiy bilan ham uchrashuv tashkil qilinmagani, ularning taqdiriga oydinlik kiritilmagani shaffoflik so'nib borayotganidan darak beradi. Oddiy misol, milliy terma jamoamiz faqat mahalliy futbolchilardan yig'ilib bo'lsa-da BAAga borib o'ynab keldi. Ketish oldidan garchi bitta o'yinga tayinlangan bo'lsa ham, Ro'ziqul Berdiev ishtirokida bir chiroyli matbuot anjumani bo'lib o'tdi, jurnalistlar turli savollarga javob olishdi. Lekin yoshlar va o'smirlarimiz bilan bunday hol bo'lmadi.
Kadrlar borasida "sirli" o'zgarishlar
O'FF Prezidenti bilan bo'lib o'tgan matbuot anjumanida Umid Ahmadjonov O'FF va PFLda 90 foziz kadrlar almashishi haqida gapirgandi. Gap isbotini topib chindan ham katta o'zgarishlar ro'y berdi. SHu paytgacha turli lavozimlarda ishlab kelgan (qaysi lavozimda ekanligini zukko muxlislar juda yaxshi bilishadi) Ahrol Inoyatov, Farhod Magometov, Asqar Tolibjonov kabi mutaxassislar ishdan bo'shatilib, ularning o'rniga boshqa kadrlar tayinlandi.
Ammo yangilarning hech biri haqida batafsil malumot berilmadi. Masalan, PFL yangi bosh direktori Omon G'ofurov bilan haligacha matbuot anjumani tashkil qilinmay kelayotgani g'alati. Bu inson shu paytgacha “UzReport” va “Sport” telekanallariga intervyu berishga ulgurdi, ammo hali butun OAV oldiga chiqib gapirgani yo'q, o'z dasturini taqdim etmadi. Qiziq, qanday qilib keng jamoatchilikka tanishtirilmasdan birdaniga intervyu berish mumkin? Axir oldin tanishtiruv o'tkazgan maqul emasmi?
O'FF texnik direktorligida esa umuman boshqacha ahvol. Bizga etib kelgan malumotlarga ko'ra, dastlab bu lavozimni SHavkat Imamov egallagandi, lekin oradan ko'p o'tmay u o'z joyini SHamil Isaevga bo'shatib berdi, bir-ikki hafta o'tar-o'tmas Vadim SHodimatov bu lavozimga taklif etildi, lekin keyinchalik u kishi yana “Bunyodkor” futbol maktabiga ketib qoldi. Keyin yana gap-so'z chiqdi: “Andijon”ni oliy ligaga olib chiqa olmagan Usmon Toshev O'FF texnik direktori bo'lar ekan. Ammo bu hozircha amalga oshgani yo'q va eshitimizcha SHamil Isaev yana ushbu lavozimga qaytganmish.
O'FFda shuningdek, ko'p yillardan beri tashkilot tizimida ishlab kelgan matbuot kotibi Sanjar Rizaevning ham ishdan olinishi g'alati bo'ldi. Biz Sanjar Rizaevni o'z ishining ustasi, futbol qonun-qoidalaridan xabardor, eng muhimi OAV bilan ishlashni biladigan mutaxassis sifatida bilamiz. Ammo nima sababdan ishdan ketdi, hayronmiz. Bu haqda ochiq bayonot berilmadi. Zero o'zini hurmat qilgan tashkilotda matbuot kotibi ham etiborga molik odamlar sirasiga kiradi, chunki tashkilot olib borayotgan ishlarni matbuot kotibi xalqqa etkazmasa, kim qiladi? Natijada jurnalistlar o'z bilganicha yozadigan bo'lib qolishmaydimi? Uning o'rniga tayinlangan Yoqubjon Bobojonovni ko'pchilik taniydi, hurmat qiladi. Muxlislar uni asosan “UzReport” TVdagi futbol sharhlari orqali bilishadi. To'g'ri, Yoqubjon - yaxshi kadr, biroq uning telekanalda ham ishlayotganini unutmaylik. SHunday bo'lgach, asosiy urg'uni kimga ko'proq qaratadi? Telekanalgami yo O'FFgami?
Xullas mana shunday voqealar sabab qanaqasiga O'FF bilan yonma-yon shaffoflik degan so'zni ham tilga olish mumkin hayronmiz. Biz tashkilotning ishlariga omad tilaymiz, ko'rinib turibdi, O'FF prezidenti Umid Ahmadjonov o'zbek futbolining biri ikki bo'lsin deb elib yugurmoqda, ammo bazi savollar ham yuzaga kelyaptiki, bu haqda yuqorida to'xtalishga harakat qildik. SHuni esdan chiqarmaylik, shaffoflik aytishga oson, biroq amal qilish juda og'ir so'z hisoblanadi. Bo'lib ham o'zbek futbolida buni birdaniga amalga oshirish qiyin. Lekin madomiki O'FF shaffof bo'lishning yo'lini tanlagan ekan, biz tashkilotni to'liq qo'llab-quvvatlaymiz, lekin shu o'rinda boshida zavq bilan boshlangan ishni oxirigacha shunday davom etishini kutib qolamiz. Yo'qsa, yana va yana turli savol-gumonlar yuzaga kelaveradi.
Bosh sahifaga
1777