Karlos Teves: “Messini yoqtirmaydiganlar futbolni tushunishmaydi”

U terma jamoaning hozirgi avlodini katta g'alabalarga haqli deb hisoblashi haqida takidlab, turnirning rasmiy sayti xodimlari bergan boshqa savollarga javob qaytardi.

- “Millat futbolchisi” degan laqab sizni to'ydirib yubormadimi?

- Yo'q, futbol laqabdan ko'ra ko'proq charchatdi.

- Nima uchun futboldan charchadingiz?

- Futbolda bunday ko'p o'ynash jonga tegadi. Tanaffussiz o'ynashga to'g'ri kelganda to'ydirib yuboradi.

- Nima sababli bazi gollaringizni futbolka ostidan kiyilgan libosni ko'rsatgan holda nishonlaysiz? Unda Argentinaning kambag'al dahalari nomlari bitilgan.

- CHunki ular mening odamlarim. Ular haqida unutib qo'yishim mumkin emas. O'sha odamlar barchadan kamroq yordam olishadi va vazifam ularni sal bo'lsa-da, xursand qila olish.

- Sizga o'z hududingizda o'ynash ko'proq yoqadimi yoki yuqori saviyada?

- Yuqori saviyadan ko'ra, o'z hududimdagi yigitlar bilan o'ynashdan ko'proq zavq olaman.

- Argentina terma jamoasi siz uchun nimani bildiradi?

- Bu klub safida qilayotgan xizmatlaring uchun mukofotdir. O'ylaymanki, bundan xursand bo'lish kerak.

- Terma jamoa futbolchisi bo'lish qulaymi yoki aksincha?

- Hozir qulay. Ayni paytda bu menga ko'proq zavq olib kelyapti.

- Avval zavq olishga nima xalal bergandi?

- Terma jamoada uzoq vaqt bo'lib kelganingda senga yoqmaydigan ko'plab narsalarni ko'rasan. Lekin terma jamoadan 4 yil chetda yursang uning futbolchi uchun hamma narsa ekanini tushunib etasan.

- Nimalarni sog'indingiz?

- Kiyinish xonasini. Yigitlarni. Muhitni ham sog'indim.

- Ushbu Amerika Kubogi 2011 yilgi musobaqa uchun revansh bo'la oladimi?

- Buni revansh deb atashni istamayman. Lekin ushbu musobaqada asosiy yuz bo'lishimizga qo'shilaman.

- Siz terma jamoa va undan tashqarida bo'lgansiz. Argentinada odamlar terma jamoani yoqtirishadimi?

- Unda boshqa odamlardan so'rashingiz lozim, mendan emas.

- Argentinaliklar Messini yoqtiradimi?

- Uni yoqtirishlariga ishonaman. CHunki u argentinalik va jahondagi eng kuchli futbolchi.

- Uni zarur bo'lgandek qadrlashadimi?

- Messini yoqtirmaydiganlar futbolni tushunmaydi. Uning xayolidan nima o'tayotganini tasavvur qilolmayman.

- 2011 yil Amerika Kubogidagi Teves va hozirgisining o'rtasida qanday farq bor?

- 8 kilogramm. O'ylaymanki, men jismonan yaxshiroq holatdaman. Ruhiy va futbol taraflama ham yaxshiroqman. Oldingiga qaraganda kuchliroq odamga aylandim.

- Futbolda sizga haligacha nima yoqadi?

- Intilish, muxlislar va uni o'rab turgan hamma narsa. Avval bularni rad etardim, endi barchasidan rohatlanyapman.

- Serxio Aguero Argentina terma jamoasining hozirgi avlodi hech narsa yuta olmasa, umrining oxirigacha bundan afsuslanib o'tishini aytdi. Bunga qo'shilasizmi?

- Ha. Bu avlod uzoq vaqt mobaynida birga bo'lib keldi. Avvalgidek bahona qila olmaymiz. Turli avlod vakillari bir-birini yaxshi bilmasligini aytolmaymiz. Bu jamoa 20 yoshdan musobaqalarda zafar quchdi. O'ylaymanki, u nimanidir yutishga arziydi.

- Nimaning evaziga Argentina terma jamoasi Amerika Kubogida g'alaba qozonishi mumkin?

- Argentinada jamoa borligiga ishonaman. O'tgan yili jamoa jahon chempionati finalida o'ynadi. Menga Martinoning g'oyalari yoqadi. U hujumni xush ko'radi, bu esa hozirgi jamoa uchun juda muhim. Argentina terma jamoasi hamisha hujum qilishi lozim. Ayniqsa, hozirgi tarkibdagi futbolchilarni hisobga olgan holda.

Behzod NAZAROV tayyorladi.