Ushbu jamoa haqida so'z ochganimiz bejiz emas. Bugungi suhbatdoshimiz – olmaliqliklar sardori Lutfulla To'raev.
- Lutfulla, Qo'qondagi muvaffaqiyatning bosh omili nimada?
- Hammamiz bir tanu bir jon bo'lib harakat qildik va mehnatlarimiz zoe ketmadi. So'nggi o'yin oldidan mashg'ulotlarda astoydil ishlagandik. «Qo'qon-1912»ga qarshi kechgan birinchi davradagi o'yinda hisob ochilmagandi. Oxirgi turdagi g'alaba evaziga chempionatni 7-o'rinda yakunladik. Agar Olmaliqdagi uchrashuvda «Neftchi»ni mag'lub etganimizda, mavsumni kuchli beshlikda yakunlagan bo'lardik.
- «Olmaliq» ikkinchi davrani omadsiz o'tkazdi. Bu siz uchun ham kutilmagan holat bo'ldimi?
- Albatta, kutmagandim. O'z uyimizdagi o'yinlarda ko'p ochko yo'qotdik. Ayniqsa, «Neftchi»ga yutqazganimiz hammasidan oshib tushdi. Qolaversa, omadsizlik ham bizga pand berdi.
- Hammasiga omadsizlik sababmikan?
- Unday emas. Murabbiyimiz bergan ko'rsatmalarni ayrim o'yinlarda amalga oshira olmadik. Bu ham asosiy omillardan biri.
- CHempionat yakunlanishiga 4ta tur qolgan bir paytda PFL qabul qilgan qaror tasir qilmadimi?
- Yo'q. Biz so'nggi beshta uchrashuvning uchtasida g'alaba qozonib, birida durang o'ynadik. Aksincha, so'nggi o'yinlardagi muvaffaqiyatli ishtirok sabab turnir jadvalida ko'tarilishga erishdik.
- Oliy ligada 12ta klub qolishiga munosabatingiz qanday?
- Malayziyada ham jamoalar soni 12tani tashkil qiladi. Faqat men to'p surgan chempionatda ikki davrali tizimda o'ynaladi. SHuningdek, yana ikkita kubok musobaqasi ham bor.
Bevosita o'zimizning chempionatga to'xtalsam, quyi o'rinlarni egallab turgan jamoalarga ancha qiyin bo'ladi. Agar yangi tizim o'zbek futboli rivojiga ishlasa, bundan ko'pchilik qatori men ham xursand bo'lardim.
- Quyi divizion hamda yoshlar ligasida futbolchilarning yoshiga chegara qo'yilishi haqida nima deya olasiz?
- Tayinli fikr aytolmayman. Bu yangilik o'zini qanchalik oqlashini vaqt ko'rsatadi.
- Bundan avval Malayziya chempionatida o'ynagandingiz. Vatanga qaytgach, O'zbekiston birinchiligida qandaydir o'zgarish sezdingizmi?
- Yo'q, hammasi o'sha-o'sha! Sezilarli o'zgarishlarni ko'rmadim.
- Sobiq jamoangiz «Lokomotiv» ikki karra mamlakat chempioni bo'ldi. Futbolchilarni tabriklashga ulgurdingizmi? Birinchi navbatda kimga qo'ng'iroq qildingiz?
- To'g'risi, hali hech kim bilan bog'lanmadim. Lekin «Lokomotiv» uchun xursand bo'ldim.
- Kelgusidagi rejalaringiz qanday?
- «Olmaliq» bilan shartnomam 30 dekabr kuni yakunlanadi. Hozir bir narsa deya olmayman. Malayziya klublaridan taklif tushsa, ketishim aniq. Har holda, ancha payt ushbu mamlakat chempionatida o'ynadim. O'zimni u erda legioner futbolchidek his qilmayman.
- Oliy ligamiz jamoalaridan takliflar tushmayaptimi?
- Ikkita aniq taklifim bor. Hozir qaror qabul qilishga shoshilmayman. Mavsum yakunlandi va asosiy etiborimni hordiq chiqarishga qarataman.
Kamoliddin ALIMOV suhbatlashdi "Interfutbol" gazetasi
Bosh sahifaga
196