Bolalar futboli bo'yicha serbiyalik mutaxassis Zavisha Miloslavlevich Toshkentga keladi

Futbol maktablarida Evropaning futboli rivojlangan mamlakatlari o'quv-metodikasi asosida ish olib borish, bolalar bilan mashg'ulotlarni yangi uslubda, Evropa andozalariga mos ravishda o'tkazish va shu yo'l orqali yuqori saviyali futbolchilarni tayyorlashga eng asosiy vazifalardan biri sifatida qaralmoqda.

Mana shu maqsadda, viloyatlar to'rtta hududga bo'lingan holda, har bir hudud uchun bir nafardan xorijlik mutaxassis jalb qilinishi haqida avval xabar berib o'tgandik. SHu yilning 17 dekabr kuni serbiyalik 56 yoshli mutaxassis Zavisha Miloslavlevich poytaxtimizga tashrif buyuradi. U mamlakatimizda bolalar futbolini rivojlantirish bo'yicha o'zining dasturini O'zbekiston Futbol Federaciyasi rahbariyatiga taqdim etadi.

O'FF rahbariyati tomonidan bu dastur o'rganib chiqilib, maqul deb topilsa, Zavisha Miloslavlevich bilan shartnoma imzolanadi. U 3-hudud hisoblangan vodiyda Andijon, Farg'ona, Namangan viloyatlarida ish olib boradi. Boshqa hududlar uchun ham Evropadan bolalar futboli bo'yicha mutaxassislarni jalb qilish maqsadida hozirda muzokaralar davom etyapti.

Zavisha Miloslavlevich haqida malumot: 1961 yil Serbiyada tavallud topgan. Murabbiylik faoliyatini 1986 yil Zagrebning “Dinamo” klubida boshlagan. Keyinchalik Serbiyaning turli yoshlardagi terma jamoalarida (U-16, U-19) faoliyat olib borgan. 2003-2007 yillar davomida Serbiya yoshlar terma jamoasida murabbiy bo'lib ishlagan.