Malumki, derbi deganda bir shahar yoki mintaqaning ikki yoki undan ortiq jamoalari o'rtasidagi keskin to'qnashuvlar tushuniladi. CHempionatimizda shu tarifga mos tushadigan bir nechta uchrashuvlar mavjud. Masalan, yakuniga etgan chempionatimizda "Toshkent derbisi" nomi ostida "Lokomotiv", "Paxtakor", "Bunyodkor" va "Obod" qarama-qarshiligi guvohiga aylangan bo'lsak, "Qashqadaryo derbisi"da viloyatning uch jamoasi "Nasaf", "Mashal" va "SHo'rtan" jamoalari o'zaro bellashdilar. SHuningdek, "vodiy derbisi" ham mavjud bo'lib, uning doirasida "Neftchi", "Qo'qon-1912" va "Navbahor" jamoalarining o'zaro hisob-kitoblarini kuzatishga muvaffaq bo'ldik.
Bugun, "Toshkent derbisi" doirasida bo'lib o'tgan o'yinlar, undagi qiziqarli faktlar haqida fikr yuritamiz. CHempionatimizning eng keskin derbisi nomiga loyiq ko'riladigan "Toshkent derbisi"da "Lokomotiv", "Paxtakor", "Bunyodkor" va "Obod" jamoalari o'zaro bahs olib borishdi. Aslida derbi maqomi ostida o'tkaziladigan o'yinlarda jamoalarning turnir jadvalida egallagan o'rni katta ahamiyat kasb etmaydi, shunday bo'lsada, yakuniga etgan chempionatimizda Toshkent klublari qo'yidagi o'rinlarni band etdi. "Lokomotiv" birinchi, "Paxtakor" uchinchi, "Bunyodkor" to'rtinchi va "Obod" o'n oltinchi. Ko'rib turganingizdek, "Obod"ni hisobga olmaganda, qolgan jamoalar orasida farq u qadar katta emas. Keling, avvalo o'tkazilgan o'zaro o'yinlarga nazar tashlaymiz:
4-tur | 30 mart | payshanba | Obod - Bunyodkor | 1:1 |
7-tur | 21 aprel | juma | Paxtakor - Lokomotiv | 1:2 |
8-tur | 29 aprel | shanba | Lokomotiv - Obod | 7:0 |
11-tur | 17 may | chorshanba | Bunyodkor- Paxtakor | 1:1 |
15-tur | 24 iyun | shanba | Obod - Paxtakor | 1:4 |
15-tur | 25 iyun | yakshanba | Bunyodkor-Lokomotiv | 1:0 |
19-tur | 26 avgust | shanba | Bunyodkor - Obod | 2:0 |
22-tur | 21 sentyabr | payshanba | Lokomotiv - Paxtakor | 0:1 |
23-tur | 29 sentyabr | juma | Obod - Lokomotiv | 1:3 |
26-tur | 26 oktyabr | payshanba | Paxtakor - Bunyodkor | 1:0 |
30-tur | 25 noyabr | shanba | Paxtakor - Obod | +:- |
30-tur | 26 noyabr | yakshanba | Lokomotiv - Bunyodkor | 3:2 |
Garchi, yakuniy jadvalda 3-o'rin bilan cheklangan bo'lsada, SHota Arveladze boshchiligidagi "Paxtakor" jamoasi derbilar doirasidagi bellashuvlarda 4 ta g'alaba, 1 ta durang va 1 ta mag'lubiyat qayd etgan. G'alabalarning 2 ta o'z maydonida qayd etilgan bo'lsa (26-turda "Bunyodkor"ni 2:1 va 30-turda "Obod" bilan bo'lishi lozim bo'lgan o'yinda texnik g'alaba), yana 2 tasi safardagi bahslarga (15-turda "Obod"ni 1:4 va 22-turda "Lokomotiv"ni 0;1) to'g'ri keladi. Hamshaharlari darvozasiga 8 ta gol urgan "sherlar" o'z darvozasidan 4 ta to'p olib chiqishga majbur bo'lgan. Urilgan va o'tkazib yuborilgan gollar nisbati +4 ni tashkil etmoqda. "SHerlar"ning durangi "Bunyodkor" stadionida bo'lib o'tgan 1-davra o'yinida qayd etilgan bo'lsa (1:1), yagona mag'lubiyat 7-tur doirasida bo'lib o'tgan o'z maydonidagi "Lokomotiv"ga qarshi bahsda qayd etilgan. O'sha kecha paxtakorchilar bo'lajak chempionga 1:2 hisobida mag'lub bo'lgan.
CHempion "Lokomotiv" derbilar jadvalida 12 ochko bilan 2-o'rinni band etgan. 6 ta o'yin o'tkazgan "temiryo'lchilar" 2 bor mag'lub bo'lgan. To'plar nisbati 15 ga 6, yani +9 ni tashkil etmoqda. Jamoa g'alabalari o'z maydonidagi "Obod" (7:0) va "Bunyodkor"ga (3:2) hamda safardagi "Paxtakor" (1:2) va "Obod"ga (1:3) qarshi uchrashuvlarda qayd etilgan. M.Yelichich shogirdlari 1-davraning so'nggi o'yinida "Bunyodkor" stadionida bo'lib o'tgan bahsda 1:0 hisobida imkoniyatni boy bergan bo'lsa, 2-davrada o'z maydonida SH.Arveladze boshchiligidagi "Paxtakor" jamoasiga ham kichik 0:1 hisobida yutqazgan. Derbidagi to'qnashuvlarda eng ko'p golni aynan "Lokomotiv" jamoasi kiritgan. Ularning hisobida 15 ta gol mavjud. SHundan 10 tasi o'z maydonidagi bahslarda kiritilgan bo'lsa, qolgan 5 ta gol safardagi bahslarga to'g'ri keladi.
"Toshkent derbisi"dagi uchinchi o'rin M.Qosimov boshchiligidagi "Bunyodkor" jamoasiga tegishlidir. "Qaldirg'ochlar" 6 ta o'yinda 2 tadan g'alaba, durang va mag'lubiyat qayd etib 8 ochko jamg'arishga muvaffaq bo'lgan. Raqiblar darvozasiga 7 ta gol kiritgan "qaldirg'ochlar", o'z darvozasidan 6 ta gol olib chiqishga majbur bo'lgan, yani to'plar nisbati +1. Kiritilgan gollarning 4 tasi o'z maydonidagi bahslarga to'g'ri keladi. Qolgan 3 ta gol safarda kiritilgan. "Bunyodkor" g'alabalari o'z maydonida "Lokomotiv" (1:0) va "Obod" (2:0) jamoalariga qarshi bo'lib o'tgan o'yinlarda qo'lga kiritilgan. Duranglar esa chempionatning 4-turida "Obod" (1:1) maydonida va "Bunyodkor" stadionida "Paxtakor"ga (1:1) qarshi bo'lib o'tgan o'yinlarga to'g'ri keladi. 2 ta mag'lubiyat 2-davraning yakuniy qismida "Paxtakor" (1:0) va "Lokomotiv" (3:2) maydonlaridagi o'yinlarda qayd etilgan.
Va nihoyat poytaxtning to'rtinchi jamoasi maqomi "Obod"ga tegishlidir. CHempionatni yakuniga etkaza olmagan jamoa derbilarning deyarli barchasida ishtirok etdi. Faqatgina so'nggi turda o'tkazilishi lozim bo'lgan "Paxtakor"ga qarshi safar bellashuvi uchun "Obod"ga texnik mag'lubiyat yozildi. Jamoa o'tkazilgan 6 ta o'yinda bor yo'g'i 1 tagina durang qayd eta oldi. CHempionatning 4-turida "Bunyodkor"ni qabul qilgan jamoa vakillari 1:1 hisobida durang natija qayd etishga muvaffaq bo'lgan. Ana shu bir ochko jamoa uchun derbilardagi yagona ochko hisoblanadi. Qolgan uchrashuvlarda 5 marta mag'lub bo'lgan (1 tasi texnik mag'lubiyat) jamoa o'z darvozasidan umumiy hisobda 17 ta to'p o'tkazib yuborgan. Urgan gollari soni esa 3 tani tashkil etadi. To'plar nisbati ham havas qiladigan darajada emas -14.
O'zaro o'yinlardan keyingi turnir jadvali esa qo'yidagicha ko'rinish olgan:
# | Jamoalar | O' | YU | D | M | T-N | +/- | O |
1 | Paxtakor | 6 | 4 | 1 | 1 | 8-4 | 4 | 13 |
2 | Lokomotiv | 6 | 4 | 0 | 2 | 15-6 | 9 | 12 |
3 | Bunyodkor | 6 | 2 | 2 | 2 | 7-6 | 1 | 8 |
4 | Obod | 6 | 0 | 1 | 5 | 3-17 | -14 | 1 |
"Toshkent derbisi"ning umimiy statistikasiga to'xtaladigan bo'lsak, 12 ta bellashuvning 2 tasidagina durang natija qayd etildi. Qolgang 10 ta bahsda u yoki bu jamoaning qo'li baland kelgan. 6 ta g'alaba mezbonlar hisobida bo'lsa, 4 tasiga mehmonlar erishgan.
O'tkazilgan 12 ta o'yinda darvozalarga 33 ta gol kiritildi. SHundan 19 tasi mezbonlar hisobiga to'g'ri kelsa, qolgan 14 ta golni mehmonlar kiritgan. "Poytaxt derbisi"da qayd etilgan eng yirik hisob "Lokomotiv"-"Obod" bahsiga to'g'ri keladi. 8-tur doirasida o'tkazilgan bahsda "temiryo'lchilar" "Obod" darvozasiga oz emas, ko'p emas naqd 7 ta javobsiz to'p kiritgan.
"Toshkent derbi"si to'purari, xuddi chempionatimiz kabi, "Lokomotiv" azosi Marat Bikmaev hisoblanadi. Uning hisobida 5 ta gol mavjud. Marat "Paxtakor" va "Obod" darvozalarini 2 martadan ishg'ol etgan bo'lsa, yana bir golni "Bunyodkor" darvozasiga kiritgan.
Undan keyingi o'rinlarda 3 tadan gol bilan "Loko" vakili Sardor Mirzaev va "Bunyodkor" azosi Dostonbek Hamdamov bormoqda.
Eslatma: Keyingi chiqishlarimizda Qashqadaryo va vodiy derbilaridagi o'yinlarga to'xtalib o'tamiz.
Bosh sahifaga
220