Oxirgi 4 mavsum davomida Qarshining "Nasaf" jamoasi safida Oliy liga o'yinlarida 23 ta golga mualliflik qilgan Azamat 2017 yilni Navoiyning "Qizilqum" jamoasida boshladi.
Mavsum Allaniyazov uchun judayam omadli boshlandi. 1-turda Toshkentda "Paxtakor" bilan kechgan o'yinning 34 daqiqasiga keliboq qoraqalpog'istonlik futbolchi gol kiritib, hisobni tenglashtirishga muvaffaq bo'ldi. Garchi ana shu o'yinda mehmonlar imkoniyatni boy berishgan bo'lsada, hujumchi uchun debyut o'yini omadli chiqdi.
Ikkinchi turda "Qizilqum" o'z maydonida "Navbahor"ni qabul qildi. Uchrashuvning 6 daqiqasidayoq hisob ochildi va bu golga aynan Azamat mualliflik qildi. Bu safar navoiyliklar uch ochkoni qo'lga kiritishdi.
SHundan so'ng hujumchi birinchi davrada yana 12 ta uchrashuvda maydonga tushdi. Biroq bu o'yinlarda unga gol urish nasib etmadi. Allaniyazov birinchi davrada 9 o'yinni asosiy tarkibda boshlab, barchasida almashtirilgan bo'lsa, 6 ta bahsni zaxira o'rindig'ida boshlab, shularning 5 tasida maydonga tushirildi. 14 o'yinda 2 ta gol urgan hujumchi "Neftchi" bilan o'yinda hakam tomonidan ogohlantirildi.
Ketma-ket 12 ta o'yinda gol ura olmagan futbolchi ikkinchi davrada Navoiyni Buxoroga almashtirdi. Buxoroliklar tarkibidagi debyut o'yinida mehmonda "Olmaliq"qa qarshi uchrashuvga to'g'ri keldi. U o'yinning 75 daqiqasida Ivan Nagaevning o'rniga zaxiradan maydonga tushdi.
"Neftchi" bilan mehmonda kechgan bellashuvning 46 daqiqasida Azamat yana Ivanning o'rniga maydonga tushdi va hakam tomonidan o'yinga qo'shib berilgan 3 daqiqada gol urib jamoasiga muhim g'alabani keltirdi. SHundan so'ng 9 ta golsiz seriyani boshdan kechirgan hujumchi chempionatning oxirgi turida "So'g'diyona" bilan o'yinning 55 daqiqasida Salamat Qutibaevning o'rniga maydonga tushdi va oradan 15 daqiqa o'tib, o'yindagi yagona golga mualliflik qildi. Ikkinchi davrada "Buxoro" libosida 12 o'yinda 2 ta gol kiritgan Azamat “Obod" bilan to'qnashuvda hakam tomonidan ogohlantirildi.
Statistikalar
- Azamat Allaniyazov O'zbekiston chempionatining ortda qolgan mavsumida 26 ta uchrashuvda 1081 daqiqa mobaynida maydonda harakat qilib 4 ta gol kiritdi va ikkita sariq kartochka bilan "siylandi".
- U 9 uchrashuvni asosiy tarkibda boshlab, 17 tasida zaxiradan maydonga tushdi.
- Allaniyazov mavsum davomida birorta uchrashuvni ham to'liq o'tkazmadi.
- Azamat mavsum davomida 4 marta Nagaevning, 3 bora Qutibaevning o'rniga zaxiradan maydonga tushdi.
Furqat Yusupov
Bosh sahifaga
223