Mamlakatimizda bolalar futbolini rivojlantirish, hududlarda bolalar va o'smirlar orasida futbolni yanada ommalashtirish borasida O'zbekiston Futbol Federaciyasi tomonidan birinchi galda bolalar murabbiylarining malakasini oshirishga alohida ahamiyat qaratilyapti.
Futbol maktablarida Evropaning futboli rivojlangan mamlakatlari o'quv-metodikasi asosida ish olib borish, bolalar bilan mashg'ulotlarni yangi uslubda, Evropa andozalariga mos ravishda o'tkazish va shu yo'l orqali yuqori saviyali futbolchilarni tayyorlashga eng asosiy vazifalardan biri sifatida qaralmoqda.
Viloyatlar to'rtta hududga bo'lingan holda, har bir hudud uchun bir nafardan xorijlik mutaxassis jalb qilinishi haqida avval xabar berib o'tgandik.
Mana shu maqsadda, serbiyalik 56 yoshli mutaxassis Zavisha Miloslavlevich poytaxtimizga tashrif buyurdi. U O'zbekiston Futbol Federaciyasi prezidenti Umid Ahmadjonov bilan uchrashib, mamlakatimizda bolalar futbolini rivojlantirish bo'yicha o'zining dasturini taqdim etdi.
O'FF rahbariyati tomonidan bu dastur o'rganib chiqilib, maqul deb topilsa, Zavisha Miloslavlevich bilan shartnoma imzolanadi.
U 3-hudud hisoblangan vodiyda Andijon, Farg'ona, Namangan viloyatlarida ish olib boradi. Zavisha Miloslavlevich hududlardagi bolalar futboli murabbiylari bilan uchrashish, u erdagi holatni o'rganish maqsadida, viloyatlarda bo'lishi ham rejalashtirilgan. Serbiyalik mutaxassis bugun Andijon shahriga jo'nab ketadi.
Boshqa hududlar uchun ham Evropadan bolalar futboli bo'yicha mutaxassislarni jalb qilish maqsadida hozirda muzokaralar davom etyapti.
Bosh sahifaga
191