"Buxoro" o'z qarorgohida yig'inni boshladi

Xususan, Ulug'bek Baqoev boshqaruvidagi “Buxoro” jamoasi ham kuni-kecha o'z qarorgohida dastlabki yig'inni boshladi. Hozircha tarkibda mahalliy futbolchilar bilan birga yoshlar jamoasidagi iqtidorli o'yinchilar shug'ullanmoqda. 25 dekabr kuni futbolchilar O'zbekiston Professional futbol ligasining maxsus ilmiy-uslub mutaxassislar guruhiga test-normativlarini topshiradi.

Jamoani hozircha hech bir futbolchi rasman tark etmadi. Ammo, yil yakuniga kelib ayrim o'yinchilarning klub bilan tuzgan shartnomasi yakuniga etadi. Murabbiylar shtabi rahbariyat bilan o'zaro maslahatlashgan xolda, bu yilgi mavsumda o'zini ko'rsatishga erishgan futbolchilar bilan kelishuvni uzaytirish borasida ish olib bormoqda.

Joriy yilgi chempionatda “Buxoro” sharafini himoya qilgan xorijlik futbolchilar – Vladimir Baenko, Kirill Pasichnik hamda Ivor Vaycer ayni damda o'z vatanida bo'lib turibdi. Ushbu legionerlarning ham amaldagi shartnomasi tugab bormoqda. Ammo murabbiylar ukrainalik himoyachi Vladimir Baenkoni imkon qadar jamoada olib qolishni rejalashtirishgan.

Bundan tashqari, yana shuni ham qo'shimcha qilish mumkinki, yanvar oyidan tarkibni kuchaytirish uchun bir nechta o'yinchilar jamoaga jalb etiladi. Ular bilan hozirda muzokara olib borilmoqda. Lekin, rasmiy kelishuvga erishilmagani bois ularning nomlari hozircha oshkor etilmaydi.  

"Buxoro" matbuot xizmati