Bu chora-tadbirlar Superliga klublarida ishtirok etadigan futbolchilarning jismoniy holatini nazorat qilish, terma jamoalarimiz uchun munosib nomzodlarni etkazish maqsadida amalga oshirilmoqda.
SHu kunga qadar O'FF tomonidan tasdiqlangan reja asosida “Olmaliq”, “Mashal”, “Navbahor”, “Qo'qon-1912”, “Cementchi” klublari futbolchilari normativlarni topshirishdi. Normativlar 4ta bosqichdan iborat ekanini avval xabar qilgandik.
1. 30 metrga yugurish
2. Turgan joyidan uzunlikka sakrash
3. 7x50 metrga yugurish
4. “Yo-Yo” test
Xo'sh, milliy chempionatimizda ishtirok etuvchi klublar futbolchilarining normativlar topshirish bo'yicha natijalari qanday?
Etiboringizga raqamlarni keltirib o'tamiz. 30 metrga yugurish va uzunlikka sakrash bo'yicha hozircha 5ta klubning hech qaysi futbolchisi belgilangan normativlardan o'ta olmaganini takidlash zarur.
7x50 metrga yugurish va “Yo-Yo” test bo'yicha natijalar quyidagicha:
7x50 metrga yugurish
# | Klub nomi | Jami qatnashganlar soni | Normativ topshirganlar | Normativ topshira olmaganlar | Foiz |
1 | “Olmaliq” | 32 | 2 | 30 | 6% |
2 | “Mashal” | 25 | 4 | 21 | 16% |
3 | “Qo'qon-1912” | 21 | 1 | 20 | 4% |
4 | “Navbahor” | 15 | 3 | 12 | 20% |
5 | “Cementchi” | 21 | 0 | 21 | 0% |
"Yo-Yo" test (Signal bo'yicha fishkalar orasida 20 m masofaga yugurish)
# | Klub nomi | Jami qatnashganlar soni | Normativ topshirganlar | Normativ topshira olmaganlar | Foiz |
1 | “Olmaliq” | 29 | 5 | 24 | 17% |
2 | “Mashal” | 22 | 2 | 20 | 9% |
3 | “Navbahor” | 13 | 5 | 8 | 38% |
4 | “Qo'qon-1912” | 17 | 5 | 12 | 29% |
5 | “Cementchi” | 21 | 2 | 19 | 9% |
Normativlar topshira olmagan futbolchilarga milliy chempionat boshlangunga qadar muhlat beriladi. Ular klub bosh murabbiyi belgilab bergan dastur orqali o'z ustilarida ishlashlari kerak.
Superliga boshlanishidan avval klub futbolchilaridan yana bir bor normativlar qabul qilinadi. Sinovlardan o'ta olmagan futbolchilar chempionatda ishtirok eta olmaydilar.
Klublar futbolchilaridan normativlarni qabul qilayotgan pedagogika fanlari nomzodi, professor SHamil Iseev bu haqida quyidagi fikrlarni bildirib o'tdi:
“Milliy chempionatimiz futbolchilaridan normativlar qabul qilish O'zbekiston Futbol Federaciyasi prezidenti Umid Ahmadjonovning talabi bo'lib, bunday normativlar endilikda har doim futbolchilardan qabul qilinadi va ularning jismoniy holati nazorat qilib boriladi.
“Bunday normativlar butun dunyoda topshiriladi. Masalan, “Yo yo test” Evropaning kuchli chempionati futbolchilaridan ham mavsum oldidan olinadi va ularning tezkorligi, chidamliligi sinovdan o'tkazib turiladi. Terma jamoamizning xalqaro maydonlardagi muvaffaqiyatsiz o'yinlarining asl sababini ham aynan mana shundan qidirish kerak.
Masalan, Jahon chempionati saralash bahslarida qatnashgan O'zbekiston milliy terma jamoasi futbolchilari o'yinlarini tahlil qiladigan bo'lsak, uchrashuv oxirlariga kelib futbolchilarning texnik-taktik harakatlar pasaygani, to'pni olib qo'yish, sheriklariga oshirish, uzun paslar berish, havodagi to'p uchun kurash va hokazolarda braklar ko'payganini ko'rish mumkin.
Bizning futbolchilar jismoniy jihatdan kuchli bo'lmaganliklari tufayli 90 daqiqa davomida faol harakat qila olishmadi. Natijada, JCH yo'llanmasi qo'ldan boy berildi. Agar milliy chempionatimizda ishtirok etadigan futbolchilarning jismoniy holati yaxshi bo'lsa, bu holat terma jamoalarimiz o'yinlariga ham ijobiy tasir ko'rsatadi”, - deydi SHamil Iseev.
O'zbekiston futbol federaciyasi prezidenti Umid Ahmadjonov ham normativlar quyidagi fikrlarni bildirib o'tdi:
“Bunday normativlar bundan buyog'iga doimiy ravishda futbolchilardan olinadi. Futbolchilarning jismoniy holati hamisha nazoratda bo'ladi. Tartib-intizom hamisha birinchi o'rinda bo'lishi kerak. Qaerdaki, tartib-intizom o'rnatilmas ekan, o'sha erda natijalar ham salbiylashib boraveradi. O'z ustida ishlamaydigan, tartib-intizomga amal qilmaydigan futbolchi va murabbiylardan natija kutish ham mantiqan noto'g'ri. Bir so'z bilan aytganda, tartib-intizomga rioya qilmaydiganlarga oramizda o'rin yo'q”, - deydi Umid Ahmadjonov.
Bosh sahifaga
1734