Hujumkor yarim himoyachi o'tgan mavsumning ikkinchi qismini “Neftchi”da o'tkazdi. Farg'onada Vadim Abramov unga katta ishonch bilan qaradi. Ammo negadir Timur u erda asosiy tarkib azosi bo'lishga qiynaldi. Yaqinda u bilan bog'lanib, shu haqda so'radik.
- Timur, o'tkan mavsumning ikkinchi qismini oliy ligada o'tkazdingiz. “Neftchi”dagi faoliyatingiz xususida nima deysiz?
- Jamoaga bosh murabbiy Vadim Abramov taklif etgach, albatta u erga ulkan niyatlar bilan borgandim. O'z o'yinlarim bilan jamoaga foyda keltirib, yutuqlariga hissamni qo'shish uchun xarakat qildim. Lekin “Neftchi”da o'tkazgan yarim mavsumimni tahlil qiladigan bo'lsam, rosti faoliyatimdan u qadar ko'nglim to'lmadi. CHunki jamoa autsayderlar qatoridan o'rin oldi. Biz futbolchilar bu vaziyatdan olib chiqib keta olmadik. Albatta bunda o'zimni ham qaysidir manoda aybdor deb bilaman.
- Yaqinda “Neftchi”ni butunlay tarqalib ketdi degan xabarni o'qigan bo'lsangiz kerak?
- Ha, saytda ko'rdim. Bu haqda har kim o'z fikrini bildirmoqda. Bilmadim kim nima deydi. Lekin men shuni aytishim mumkinki, “Neftchi” butunlay yo'q bo'lib ketmaydi. Axir jamoa o'z tarixi va o'rniga ega. Menimcha endi jamoa yangitdan tashkil topsa kerak.
- O'zingiz “Neftchi”dagi faoliyatingizni davom ettirasizmi yoki yana jamoani o'zgartirasizmi?
- 31 dekabr kuni jamoa bilan tuzgan shartnomam o'z kuchini yo'qotdi. Fikrimcha endi u erda boshqa o'ynamasam kerak.
- Kelgusi rejalar qanday?
- Bu borada hozircha aniq bir to'xtamga kelmadim. Yaqin orada keyingi taqdirimga to'liq oydinlik kiritiladi degan umiddaman.
- Takliflar bo'lyaptimi?
- Hozircha biror bir klubdan aniq taklif olganim yo'q. Lekin taklif bo'lishiga umid qilaman.
- Hozirgi sport formangiz qay darajada? Yana super-ligada o'ynashga tayyormisiz?
- Tan olaman, ayni damda sport formam yuqori darajada emas. Lekin har kuni o'z ustimda ishlab, ideal darajaga chiqishga xarakat qilyapman. Bugungi kunda optimal formaga kirib borish uchun Toshkentda “Oq-tepa” jamoasi mashg'ulotlarida ishtirok etyapman. Menimcha har bir futbolchi super-ligada o'ynashni xohlaydi. SHu jumladan men ham bu yil yana super-ligada bo'lishni istayman.
Bosh sahifaga
221
