O'zbekiston futbol federaciyasi fuqarolarning o'zini o'zi boshqarish organlaridagi voyaga etmaganlar, yoshlar va sport masalalari bo'yicha komissiyalari faoliyatini samarali tashkil etish, yoshlar o'rtasida sog'lom turmush tarzini targ'ib etish, ular o'rtasida futbolni ommalashtirish hamda muxlislik madaniyati rivojlantirish borasida yaqindan hamkorlik qilish bo'yicha memorandum imzoladi.
Memorandumga ko'ra, O'zbekiston futbol federaciyasi va “Mahalla” xayriya jamoat fondi hamkorlikda bolalar va o'smirlar futboli ommaviyligini taminlash maqsadida kam taminlangan va ijtimoiy himoyaga muhtoj oilalar farzandlari uchun bepul futbol guruhlari tashkil etish, havaskor futbolchilar o'rtasida o'tkaziladigan “Futbolimiz kelajagi” va “CHarm to'p” turnirlarini tashkil etish va o'tkazish, ularda o'zini har tomonlama ko'rsata olgan havaskor futbolchilarni professional jamoalarga tavsiya qilish, joylardagi mahalla bolalari o'rtasida turli futbol festivallari, bayram tadbirlari tashkil etish, mahallalarda barpo etilgan futbol maydonlaridan maqsadli foydalanish ishlarini yo'lga qo'yish, ularni asosan bolalar va o'smirlar o'rtasidagi musobaqalar uchun muvofiqlashtirish kabi chora-tadbirlarni amalga oshiradi.
Hamkorlikda o'tkaziladigan hududiy va respublika miqyosidagi futbol musobaqalarida g'oliblikka erishgan futbolchilar va ularning murabbiylari muntazam ravishda rag'batlantirilib boriladi.
Tez orada O'zbekiston Respublikasi Xalq talimi hamda Oliy va o'rta-maxsus talim vazirliklari bilan ana shunday memorandumlar imzolanishi kutilmoqda.
Bosh sahifaga
104