Ayni damda ham 34 yoshli futbolchi farg'onaliklarning yig'inida ishtirok etib kelmoqda. Xo'sh, Mamazulunov joriy mavsumni yana “Neftchi”da o'tkazadimi? SHu va boshqa savollarga javob olish maqsadida Mo'ydin bilan qisqacha suhbatlashdik.
- Ayni damda Farg'onada “Neftchi”ning o'quv-yig'in mashg'ulotlarida ishtirok etmoqdaman. Kuniga bir mahaldan shug'ullanyapmiz. Bu yil ham superligada ishtirok etishga umid so'nmadi. SHuning uchun yana “Neftchi”da qolib, bo'lajak mavsumga hozirlik ko'rmoqdamiz – deya gap boshladi Mo'ydin Mamazulumov.
- O'ylaymanki Superligada ishtirok etadigan bo'lsak, yangitdan tarkibni shakllantirib olish ortiqcha muammo keltirib chiqarmaydi. To'g'risi, “Neftchi”ni tark etgan o'yinchilar jamoa uchun u qadar katta yo'qotish bo'lmoqda degan fikrdan yiroqman. Bundan ortiqcha fojea yasash kerak emas. Futbolda o'zi shunaqa – kimdir ketadi, kimdir keladi.Almashtirib bo'lmas o'yinchining o'zi yo'q.
- O'zingiz yaxshi bilsangiz kerak, hozir klubda hech narsa aniq emas. Menimcha yaqin orada jamoaning yangi raisi va bosh murabbiyi tasdiqlanadi. SHundan so'ng aniq reja asosida ish olib boriladi.
- O'tgan mavsum “Neftchi” uchun juda ham og'ir kechdi. Jamoaning qayd etgan natijasi ko'pchilik ishqibozlar qatori meni ham ochig'i juda ranjitdi. Yil boshida jamoaga ulkan maqsadlar bilan kelgandim. O'zim farg'onalik bo'lganim uchun ham “Neftchi”ga qo'limdan kelganicha yordam berishni istagandim. Jamoa bilan yuqori o'rinlarni egallashni o'ylaganman. Bu yo'lda qo'limdan kelganicha o'ynab, jamoaga yordam berishga xarakat qildim.
- Jamoaning salbiy natija qayd etganiga turli sabablarni keltirish mumkin. Xabaringiz bor, jamoada avvaliga rahbariyat va keyinchalik bosh murabbiy o'zgardi. Davralar oralig'ida tarkib ham deyarli boshqatdan tashkil etildi. Har qanday jamoada murabbiyning almashinuvi istaysizmi yo'qmi, baribir tasir qiladi. Ko'p o'yinlarda bizdan omad ham yuz o'girdi. Bazida yoshlarga mahorat etishmadi.
- Bu yil ham jamoada qolamanmi? Bu narsa ko'proq klubning yangi rahbari va bosh murabbiyi kim bo'lishiga bog'liq. Qolaversa joriy mavsum superliga yoki pro-ligada o'ynaymizmi? SHunisi ham aniq bo'lmadi. Agarda rahbariyat va bosh murabbiy ishonch bildirib, yordam berishimni so'rasa shu erda qolib o'ynashda davom etaman.
Islombek Rustambekov suhbatlashdi.
Bosh sahifaga
309