O'zbek futbolidagi eng yaxshi o'yinchilardan biri, "Paxtakor"ning 1960-yillardagi sardori va afsonaviy jamoa murabbiyi bundan 85 yil avval dunyoga kelgandi.
U futbol o'ynashni Toshkentda "Medik" bolalar jamoasida boshlagan. Keyin "Trud" jamoasiga ko'chib o'tgan. 1953 yil Idgay Borisovichni "Spartak"ka taklif etishdi.
1956 yil "Paxtakor" jamoasi tashkil qilinganda Tazetdinov boshqa bir qator futbolchilar qatorida yangi jamoa safini to'ldirdi.
1962 yil u jamoa bilan oliy ligada 6-o'rinni egallab, sport ustasi unvoniga loyiq ko'rilgan.
"Paxtakor" tarkibida yarim himoyachi chempionat bahslarida 202 uchrashuvda 33 to'p kiritgan. Kubok bellashuvlarida 13 o'yinda 1 gol muallifiga aylangan. 13 xalqaro uchrashuvda jamoa sharafini himoya qilgan.
1977 yil "Paxtakor"ga ikkinchi murabbiy sifatida taklif etilgan. Bevosita uning olib borgan selekciyasi yordamida jamoa oliy ligaga yo'llanmani qo'lga kiritdi. Tazetdinov "O'zbekistonda xizmat ko'rsatgan murabbiy" unvoni bilan taqdirlandi.
1979 yil "Paxtakor" UEFA Kubogida ishtirok etishga imkon beradigan o'rinlardan biriga davogarlik qilayotgandi, ammo Minskka uchish chog'ida mashum halokat ro'y beradi.
Idgay Borisovich Tazetdinov 1979 yil 11 avgust Dneprodzerjinsk osmonida "Paxtakor" azolari bilan halok bo'ldi.
Ashaddiy ishqibozlar, do'stlari, faxriy hamkasblari Idgay Tazetdinovni ajoyib futbolchilik va murabbiylik faoliyati orqali doimo yodga olishadi.
"Paxtakor" futbol klubi hamisha klub shakllanishi va muvaffaqiyatlariga hissa qo'shgan insonlar xotirasiga hurmat keltiradi, ularni yodga oladi.
Bosh sahifaga
201
