"Qo'qon-1912": Ko'zguda – legionerlar

Bugungi maqolamizda legionerlarning faoliyatiga to'xtalib o'tamiz.

Universal futbolchi

Rossiyalik himoyachi Igor Golban ana shunday tarif berish mumkin. U Qo'qondagi bir yillik faoliyati davomida muxlislar mehrini qozona oldi. Golban asli himoyachi bo'lishiga qaramay, boshqa amplualarda ham to'p surganiga guvoh bo'ldik. Masalan, G'uzorda “SHo'rtan”ga qarshi kechgan o'yin oldidan Golban murabbiylarga bugun meni hujumga qo'ying gol uraman, degani tahsinga sazovor. G'uzorga katta yo'qotish bilan yo'l olgan jamoamizning oldingi chizig'ida maydonga tushgan Golban o'sha kuni vadasiga vafo qilib raqib darvozasini ishg'ol etdi. SHunday keyin 25 yoshli futbolchini tez-tez hujumda ko'radigan bo'ldik.

So'nggi turda esa Igorning yana bir ochilmagan qirrasi kashf etildi. “Bunyodkor”ga qarshi kechgan o'yin yakunlanish arafasida “Qo'qon-1912” darvozaboni Ruslan Matniyozov qizil kartochka olib maydonni tark etdi. Bu vaqtga kelib, jamoamiz uchta futbolchini almashtirib bo'lgandi. Natijada Golban qo'lqopni kiyib darvoza tomon yo'l oldi. Bu orqali Golban haqiqiy universal o'yinchi ekanligini namoyish etdi.

SHuningdek, Golban mavsum davomida “Qo'qon-1912” mudofaa chizig'ining ishonchgan tog'iga aylana oldi. Uning himoyadagi ishonchli o'yinlari g'alabalar uchun zamin yatardi.

Mana shunday legionerlar soni mamlakatimizda ko'payishini istaymiz.

Ishonchni oqlamagan – Argun

Tanganing orqa tomoni ham bo'lgani kabi transferlardan biri o'zini oqlamadi. Qo'qonlik murabbiylar Vladimir Argunga harchand ishonch bildirishmasin, u raqiblar darvozasiga yo'l topa olmadi. 24 yoshli hujumchining harkatlari besamar ketgach, ikkinchi davrada rossiyalik legionerning shartnomasi  bekor  qilindi.