O'z davrining etuk hujumchilaridan biri bo'lgan Qutiboev qarshisidagi har qanday himoyachini butun o'yin davomida sarosimada ushlab turardi. Yakka kurashlardan sira o'zini olib qochmagan sobiq futbolchi, butsalarini mixga ilgach malum muddat murabbiy sifatida ham faoliyat yuritdi. Ammo so'nggi yillarda Qutiboev katta futbolda ko'rinish bermay qo'ydi. Pro-liganing eng kamtarona klublaridan biri bo'lgan “Orol” jamoasini uzoq yillar davomida musobaqada munosib ishtirok etishini taminlab kelgan Nematulla Qutiboev jamoada yuzaga kelgan moliyaviy qiyinchiliklarga ortiq chiday olmadi va natijada istefoga chiqishni lozim topdi. So'ngra boshqaruv ruliga uning jiyani bo'lgan Temur Turdiev keldi va o'ynovchi murabbiy sifatida adashmasak ikki yil “Orol”ni boshqardi. Yaqinda Turdiev ham jamoasini o'zgartirishga qaror qildi. Aniqrog'i Temurni “So'g'diyona” ustozi Aleksandr Mochinov o'z yoniga chaqirib oldi. Xo'sh, endilikda Nukus jamoasini kim boshqaradi. Drijyorlik vazifasida yana Nematulla Qutiboevni ko'ramizmi? Bu borada murabbiyning o'zi nima deydi?
– Ochig'ini aytganda, ancha vaqtdan beri katta futboldan uzoqdaman desam ham bo'ladi. Ayrim sabablarga ko'ra, biroz dam olmoqdaman. Urganch olimpiya zaxiralari kollejida ham faoliyat yuritayotgandim. Hozir u erda ham ishni to'xtatganman. To'g'risi, yana “Orol”ga qaytamanmi yo'qmi bu haqda tayinli bir gap aytishim qiyin. Jamoaga avvalo sidqidildan ishlash uchun kerakli sharoitlarni yaratib berish lozim. Keyin astoydil eng shimarib ishlasangiz bo'ladi. Balki bizda ham vaqti kelib shunday bo'lar. (Kulib) Jamoani 8 yil mobaynida boshqargan bo'lsam, har yili yaxshi ham bo'lib ketar deya umid qilib ishladik. Kelgusi rejalar haqida aniq gap aytish qiyin. Hammasini vaqt ko'rsatadi. Lekin yaqin orada katta futbolga qaytish niyatim bor. Sevgan kasbimni juda sog'inganman – deydi Qutiboev.
“Orol” jamoasi hozircha yig'inni boshlagani yo'q. Balki rahbariyat yaqin vaqt ichida jamoaga katta etibor qaratar.
Islombek Rustambekov.
Bosh sahifaga
1894