Ana endi klublar tayyorgarlikning hal qiluvchi bosqichini boshlashadi. Xabaringiz bor, shu kunlarda bir qator klublar yangi mavsum oldidan o'rtoqlik uchrashuvlari o'tkazishmoqda. Bundan Jizzaxning "So'g'diyona" klubi ham mustasno emas.
Ammo jizzaxlik muxlislarni xavotirga solayotgan jihat shuki, jamoa bu yil Superligada o'zini ko'rsata olarmikan? Bunday deyishimizning boisi "So'g'diyona" Toshkentda avvaliga "Paxtakor", keyin "Bunyodkor"ga qarshi nazorat uchrashuvi o'tkazib, ikkala o'yinda o'z darvozasidan oz emas ko'p emas 13 (!) ta gol o'tkazib yubordi.
Yani, jamoa "Paxtakor"ga 0:7, keyinroq "Bunyodkor"ga 0:6 hisobida imkoniyatni boy berdi. Yaxshi bilasiz, "So'g'diyona" darvozasiga etti bor to'p kiritishning uddasidan chiqqan "Paxtakor" Doxaga borib "Al Garafa"dan 1:2 hisobida mag'lub bo'lib keldi. Natijada jamoa OCHL guruh bosqichiga chiqa olmadi.
Lekin gap hozir bu haqda emas, balki "So'g'diyona"ning holati haqida. PFL bu klubga imkon berib Superligada olib qoldi, lekin erta-indin rasmiy o'yinlar boshlanib qolsa "So'g'diyona" nima qiladi? Superliga nomiga muvofiq super o'yin ko'rsata oladimi? Qolgan 11ta jamoaga etarlicha raqobat qila oladimi?
Aytishimiz mumkin, axir bu o'rtoqlik o'yinlari-ku, vahimaga na hojat. To'g'ri, bu shunchaki mavsumga tayyorgarlikning bir qismi, biroq gap Superliga klubi haqida ketayotganini unutmaylik. Nima bo'lganda ham ikkita o'yinda birortayam gol urmasdan 13ta to'p o'tkazib yuborish "So'g'diyona" uchun g'alati. Bu esa yangi bosh murabbiy Aleksandr Mochinovni ham chuqur o'yga solayotgan bo'lsa ajab emas.
Aytgancha, "So'g'diyona" bu yilgi chempionatni safarda "Paxtakor"ga qarshi bahs bilan boshlaydi.
Bosh sahifaga
116