Kilian Mbappe CHempionlar Ligasining o'tgan mavsumida futbol dunyosiga yorib kirgandan so'ng, ijtimoiy tarmoqlarda: yosh bolakay o'z krovatida o'tirgani, xona devorlari esa Krishtianu Ronaldo suratlari aks etgan plakatlar bilan deyarli to'lib yotardi.
“U “Real” muxlisi, Krishtianu esa uning kumiri, – deb izoh berdi Kilianning otasi France Football nashriga bergan intervyusida. – U soatlab internetda Ronaldo o'yini haqidagi videolarni ko'rib o'tirardi”.
14 yoshida Mbappening omadi chopdi. Zinedin Zidan uni “Real”ga taklif qildi. Ammo yaqinda futbolchi otasi tan olganidek, oiladagilar hech qachon Madridga ko'chib o'tish borasida jiddiy o'ylab ko'rmagan.
Bir haftalik o'ziga xos ko'rik, shunchaki yosh bolakay uchun tug'ilgan kuniga sovg'a edi. “Santyago Bernabeu”da bo'lish, buyuklar mashg'ulotini bevosita kuzatish, Krishtianu Ronaldoning o'zi bilan ko'rishish va birga rasmga tushish baxti...
Bu rasm hamon Kilianning telefonida saqlanar ekan, ammo u endi o'zini mustaqil va atrofdagilarga taqlid qilmaydigandek ko'rsatishga harakat qilmoqda.
“Ronaldu – bolalikdagi kumirim, u bilan ko'rishish juda ajoyib. Ammo endi buning barchasi tarixda qoldi, – degandi Mbappe 2017 yil oxirida. – Men oldimga qo'ygan maqsadlar sari harakat qilaman. SHunday ekan raqib kim bo'lishining unchalik ahamiyati yo'q. Men “Bernabeu”ga g'alaba qozonish uchun ketyapman”.
Ispaniyadan zafar quchib qaytish nasib qilmadi, “zato” Kilianning orzusi ushaldi. U kumiri Krishni maydonda, o'zaro to'qnashuvdan so'ng quchoqlay oldi. Yoshlikda berilgan ko'ngil ayrilmas bir narsa ekan.
Nozima Zaripova tayyorladi.
Bosh sahifaga
1310