Kunning birinchi yarmida futbolchilarning bir guruhi Laslo Yambor qo'l ostida "The Meydan" mehmonxonasi fitnes zalida shug'ullanishdi. 13 nafar o'yinchi bir yarim soatga yaqin vaqt mobaynida jismoniy imkoniyatlarni o'stirishga mo'ljallangan mashqlarni bajarishdi.
Kechki mashg'ulot esa "Nad Al SHeba" majmuasi maydonida bo'lib o'tdi. Maydonga tushgan futbolchilar dastlab Gocha Tkebuchava boshchiligida ozroq qizishib olishdi. Keyin esa tezlik bilan to'pni bir-birlariga etkazib berish, kichik hududda raqib bosimidan chiqib ketish uchun turli holatlar ustida mashq qilindi. Navbatdagi ikki mashqda uch futbolchi ikki raqibga tezkor hujum uyushtirish va hujumni zarba bilan yakunlash, shuningdek, o'yindagi turli taktik vaziyatlarda qanday yo'l tutish kabi holatlarga etibor qaratildi.
Ikkinchi kungi mashg'ulot to'pni qanotdan jarima maydoniga oshirib berish hamda jarima zarbasidan to'pni darvozaga yo'llash mashqlari bilan yakunlandi.
17 fevral kuni "Paxtakor" BAA yig'inidagi birinchi nazorat bellashuvini mahalliy "Al-Dafra" jamoasiga qarshi o'tkazadi. O'yin "Jebel Ali" majmuasi stadionida Toshkent vaqti bilan 17:00da boshlanadi
Bosh sahifaga
1124