Jamoasini ECHL guruh bosqichiga olib chiqqan azamatlar #2 FOTO

Bir kun oldingi o'yinlarda o'zini ko'rsatgan 5 nafar futbolchi haqida maqola tayyorlagandik. Manba. Navbat kecha bo'lib o'tgan bahslarda qahramon bo'lganlarga etib keldi.


Qozog'iston klubi birinchi marta Evropa chempionlar ligasi guruh bosqichida ishtirok etadi! Qo'shnilarimiz chempioni Evropaning eng nufuzli musobaqasida o'ynaydi. "Astana" Kiprning APOEL klubi qarshiligini enga oldi. Dastlabki o'yinni o'z maydonida o'tkazib 1:0 hisobida zafar quchgan "Astana" javob bahsida 1:1 hisobida durang o'ynadi. Bunda jamoaning serbiyalik yarim himoyachisi Nemanya Maksimovichning xissasi katta bo'ldi. O'z vaqtida "Verona"da o'ynagan futbolchi shu yilning fevral oyida Qozog'iston klubiga kelgan. Javob bahsida aynan u so'nggi daqiqalarda mezbonlar darvozasiga gol urdi.

APOEL (Kipr) - "Astana" (Qozog'iston) 1:1 (birinchi o'yin 0:1)
Qahramon - Nemanya Maksimovich

"Manchester Yunayted" qaytdi. Bir yillik tanaffusdan so'ng "qizil iblislar" Evropa maydoniga qaytdi. Jamoa pley-offda Belgiyaning "Bryugge" klubini ikki o'yinda ham taslim qildi. Manchesterda o'tgan ilk bahsda Memfis Depay dublga erishgandi. Kechagi javob o'yinida Ueyn Runi xet-trikka erishdi. SHu bois ikkala futbolchini qahramon sifatida tanladik.

"Bryugge" (Belgiya) - "Manchester Yunayted" (Angliya) 0:4 (birinchi o'yin 1:3)
Qahramonlar - Memfis Depay va Ueyn Runi

Belarusning BATE klubi Evropa chempionlar ligasi guruh bosqichiga Serbiya chempioni "Partizan"ni engib yo'l oldi. Ilk o'yinda 1:0 hisobida zafar quchgan BATE javob bahsida birinchi bo'lib gol urdi. Igor Stasevich tomonidan kiritilgan to'p belaruslarning imkoniyatini oshirib yubordi. To'g'ri o'yin davomida serblar ikkita gol urishdi, ammo bu keyingi bosqichga chiqish uchun etarli bo'lgani yo'q.

"Partizan" (Serbiya) - BATE (Belarus) 2:1 (birinchi o'yin 0:1)
Qahramon - Igor Stasevich

"Bayer" klubi Rimning "Lacio" klubi to'sig'idan o'ta oldi. Italiyada tashkil etilgan bahsda "Lacio" 1:0 hisobida zafar quchgandi. Javob bahsida esa nemislar yirik g'alabaga erishishdi. Bu yirik g'alabaga Xoqon CHalxonogluning tezkor goli zamin yaratib berdi.

"Bayer" (Germaniya) - "Lacio" (Italiya) 3:0 (birinchi o'yin 0:1)
Qahramon - Xoqon CHalxonoglu

O'tgan mavsum Rimning "Roma" klubiga sotib yuborilgan Seydu Dumbiya yana CSKAga qaytdi. Afrikalik futbolchi bo'lmaganida balki Moskva klubi guruh bosqichiga chiqa olmasmidi. Har holda aynan Seydu Portugaliyada bitta, Moskvadagi o'yinda ikkita gol urdi. Haqli ravishda aynan Dumbiyani CSKAning qahramoni sifatida tanladik.

CSKA (Rossiya) - "Sporting" (Portugaliya) 3:1 (birinchi o'yin 1:2)

Qahramon - Seydu Dumbiya

Narzulla Saydullaev tayyorladi