"Ertaga o'tgan turda ikkita mag'lubiyat alamidagi jamoalar o'rtasida kurash kechadi. O'ylaymanki, o'yin har tomonlama qiziqarli bo'ladi. Maqsad aniq - g'alaba. Bu o'yin biz uchun juda muhim", - deya gap boshladi Ro'ziqul Berdiev.
- Jamoamiz Tehrondagi o'yinda hayajon evaziga o'z futbolini to'liq namoyish eta olmadi. Xatolar ham shuning natijasida keldi. Ko'plab futbolchilarimiz bu darajada o'ynashmagani sezilib qoldi. Biz Erondagi xatolardan tegishli xulosalarni chiqaramiz. To'g'ri takidlab o'tdingiz, Tehrondagi bellashuvda jamoani boshqaradigan etakchi topilmadi. Jamoa butkul o'zini yo'qotib qo'ygandi. Uchrashuvdan keyin futbolchilar bilan bu xususida gaplashib oldik va o'yinni chuqur tahlil qildik. Ertangi uchrashuvda muxlislarimiz ko'magi ostida faqat va faqat g'alaba uchun kurashamiz. Umid qilamanki, "Al Vasl"ga qarshi o'yinda muxlislarimizga yaxshi o'yin va chiroyli g'alabani taqdim etamiz. Ertangi uchrashuvga jamoani ruhan tayyorlayapmiz. OCHLda har bir o'yin yuqori saviyada o'tadi. Jamoa bunga tayyor bo'lishi lozim. Bizning maqsad guruh bosqichidan muvaffaqiyatli o'tishmi, demak munosib ishtirok etishimiz lozim. O'z uyiimizdagi o'yinlarda muxlislarimiz ham bizga yaqindan yordam berishlariga ishonaman. O'yin amaliyoti kamligi va boshqa bahonalar o'tmaydi.
"Al Vasl"ni yaxshi o'rgandik. Bu jamoaning hujum chizig'i ancha kuchli. Biz ertaga o'z o'yinimizni ko'rsatgan holda g'alaba qozonishimiz talab etiladi. Boshqa omillar ikkinchi darajali. Biz ularga qarshi har tomonlama tayyorgarlik ko'rdik. Eng avvalo futbolchilarni ertangi muhim uchrashuvga ruhan tayyorlashga alohida etibor qaratdik. SHuningdek, jamoamiz taktik tarafdan ham tayyor.
Jahongir Aliev? Bu futbolchi yig'in doirasidagi oxirgi nazorat o'yinida jarohat olib safdan chiqqandi. Ikki kun avval Aliev umumiy guruhda shug'ullanishni boshladi. Lekin hozirda Aliev jamoamizga foyda keltiradigan holatda emas. Ertaga Alievni o'yin qaydnomasiga kiritish yoki kiritmaslikni o'ylab ko'ramiz. Sababi, u hali to'liq tayyor emas.
Maqsud Karimov nega maydonga tushmayapti? Uning katta tajribasi va mahoratiga ishonamiz. Kerakli paytda Karimovning xizmatlaridan ham foydalanamiz.
Igor Golban ("Nasaf" himoyachisi): "Qarshida bir yillik tanaffusdan keyin OCHL qaytdi. Bizning maqsadimiz OCHLda munosib ishtirok etib muxlislarimizni xushnud etish. "Al Vasl"ga qarshi bahsda g'alaba qozonib suyukli ishqibozlarimizni kayfiyatlarini ko'tarishga kuchimizni sarf etamiz. Erondagi o'yinda yaxshiroq o'ynadim? Futbolda bir kishini alohida ajratib ko'rsatish noto'g'ri. Jamoa yutqazdi. Demak barcha yomon o'ynagan. Biz o'sha bahsda yo'l qo'ygan xatolarimizdan xulosa chiqardik va bu xatolarni keyingi bellashuvlarda takrorlamaslikka harakat qilamiz.
Qaysi sxemada o'ynash men uchun qulayroq? To'rt himoyachi yoki uch markaziy himoyachi bilan ham o'ynashning o'ziga yarasha qulay taraflari bor. Menga farqi yo'q. Uchta markaziy himoyachi bilan o'ynash bu himoyaviy o'yin degani emas, aksincha bu jamoaga bazi poziciyalarda erkinlik beradi. Biz bazan raqibdan kelib chiqib o'z taktik sxemamizni o'zgartiramiz", - deydi Igor Golban.
Bosh sahifaga
203
