Rahmatlining ismi Xudoyberdi edi, odamlar esa Xudo so'zini eshitishlari hamonoq, uni shirk keltirganlikda ayblashdi va toshbo'ron qilishdi.
Zamonamizda birovga tosh otish mumkin emas. Asosan gap otiladi bizda. Biroq holat o'zgarmagan. Maqola yoki video taqdim etilsa, odamlar uni ko'rmasdan turib, sarlavhasiga qarab fikr bildiradi. Bazilar maqolani o'qimaganligini ochiq tan olib, u haqda dadil fikr bildirishda davom etadi, lol qolaman. Ahamiyatli tomoni, mana shundaylarning 99 foizi erkaklardir.
Biror voqea yoki masala yuzasidan fikr bildirish jurnalist uchun qo'l uchida qilinadigan ish emas. Oldin o'rganib, tekshirib, fikr yuritib, keyin ish boshlash yaxshi. Qandaydir maqola ostida muallif noo'rin tanqid qilinayotgan bo'lsa, ko'pga qo'shilib, o'zim ham toshbo'ron qilib ketishdan tiyilaman. Ziyoli, o'zining shaxsiy qarashlari va principlari bor odam fikrida sobit tura oladi, deb hisoblayman. Aytmoqchimanki, toshbo'ron qilish qochmaydi, shunchaki oldin u nima deganini bilishim shart, deb hisoblayman.
Maqolalar ostida qoldiriladigan fikrlar kayfiyatimga yomon tasir ko'rsatadi, ruhiy tushkunlikka tushib qolaman, demayman, buni hamkasblarim yaxshi bilishadi. SHukr, o'rinli tanqidni o'rinsizidan ajrata olaman. Aytishim kerakki, o'zbek futboli haqida ko'p chiqishlar qildim, kimgadir yoqmaydigan narsalar yozdim, kimnidir tanqid qildim. Fikr bildirayotganlar orasida o'sha tanqidlarga duch kelib qolgan odamlarning yo o'zlari yoki yaqinlari ham borki, ular fikr bildirayotganda darhol shaxsiyatdan boshlaydi. CHunki men tomonimdan ularning tomorqasiga tosh otilgan, maqolada nima deyilgani ular uchun ahamiyatsiz, yomon ko'rishdi, vassalom.
Bemalol, tanqid qiling, yomonlang, fikringizni bayon eting, bunga haqlisiz. Barchada tanlov huquqi bor, buni doim hurmat qilaman. Va aytamanki, millionta haqorat kelib tushganida ham, o'z yo'limda davom etaman. Menga ish beruvchi mendan foyda yo'qligini bilib, bo'shatib yubormagunicha shu. Raqobat haqida gap ketganida esa nokamtarlik bo'lsa ham aytaman, o'zimizdagi istalgan futbol jurnalisti bilan raqobatga tayyorman.
Aytmoqchi bo'lganim, hech bo'lmaganda maqolani o'qib, videoni tomosha qilib ko'ring. SHunda fikrlaringiz jilla qursa kulgili bo'lib qolmaydi. Undagi biror bir fikr yuzasidan kimdadir taklif, etiroz bo'lsa, hammasiga javob berishga tayyorman. Tez orada Championat.asia buning uchun imkoniyat yaratib beradi.
Bosh sahifaga
2051