Tashrif “Muruvvat nogironli bo'lgan bolalar uchun internat”dan boshlandi. Jamoa azolarini muassasa rahbari Abdug'ani Turdiboev va bir qator ishchi-xodimlar qarshi olishib, tadbirga yig'ilgan imkoniyati cheklangan bolalar oldiga boshlab borishdi.
Tadbirni “Neftchi” PFK matbuot xizmati xodimi Hojiakbar Jabborov tantanali ravishda ochib, so'z navbatini klub texnik direktori Abdusamad Nazirdinovga taqdim etdi.
– Jamoamiz Sizlar bilan uchrashuvni anchadan beri niyat qilib kelgandi, – deb gap boshladi Abdusamad Nazirdinov – Rahbarlarimiz ham Siz bolajonlarga o'zlarining samimiy tilaklarini etkazib qo'yishni iltimos qilishgan. Mana bahor ayyomi ham yaqinlashmoqda. SHu qatori xotin-qizlar va “Navro'z” bayramlari bilan hammani tabriklab qolamiz. Barcha qilayotgan xayirli ishlarimiz xalqimizning farovon xayoti uchun, biz esa o'z o'yinlarimiz orqali Farg'ona ahlini bu yil xushnud etib, yuqori marralarni zabt etgan holda jamoaning mavqeini tiklashga vada beramiz. Nasib qilsa, bu yildan boshlab chempionatimiz bahslari televidenie orqali jonli efirda namoyish etilishi kutilmoqda. SHu sabab “Neftchi” ishtirokidagi o'yinlarni TV orqali ko'rishingiz uchun bugun jamoamiz nomidan mazkur muassasaga televizor sovg'a qilmoqchimiz, – dedi A.Nazirdinov
SHuningdek, jamoa himoyachisi SHukur Po'latov ham so'zga chiqib, imkoniyati cheklangan bolalar va muassasa xodimlariga o'z niyatlarini bildirdi. Bolajonlar mehmonlarning sovg'a- salomlarini qabul qilgach, mazkur uchrashuvdan bir olam zavq olishganini takidlab o'tish o'rinlidir.
SHundan so'ng “Neftchi” azolari Farg'ona shahridagi “Qariyalar uyi”ni ziyorat qilib, u erdagi keksalar bilan hamsuhbat bo'ldilar. Darhaqiqat, inson dunyoga kelib o'sadi, ulg'ayadi, umr guzaronlik qiladi. Kechagi go'dak bugun yigit, bo'yi etgan qiz. Vaqt o'tishi bilan, nasib etsa, har bir inson qarilik yoshiga etadi, bu – hayot qonuniyati. Futbolchilarning o'zlari ham yoshi ulug'larning holidan xabar olib, ko'ngillari ko'tarildi. Mavsum davomida mana shunday uchrashuvlarni tez-tez o'tkazib turishni takidlashdi.
Kunning ikkinchi qismida Marg'ilon shahridagi 1-sonli bolalar uyi “Neftchi”ning so'nggi tashrifiga aylandi. Mazkur muassasada tarbiya topayotgan bolalar futbolchilarni iliq kutib olishdi. Uchrashuv davomida ularga ham klub sovg'alari taqdim etildi. Tadbir so'ngida “Mehribonlik uyi” rahbariyati sportchilarga tashriflari uchun o'z minnatdorchiliklarini izhor qilishdi.
Bosh sahifaga
297