Saudiya chempionatida jamoalar soni oshiriladi

Malumki, hozir ushbu davlat Pro ligasida 14ta jamoa kurash olib bormoqda. Mutaxassislarning aytishicha, bu kamlik qilyapti. Natijada jamoalarni 16taga etkazish fikri maqullandi. Saudiya Arabistoni futbol federaciyasi birinchi liga klublariga qo'yilgan legionerlar limitini ham ko'rib chiqdi va jamoalarning etti nafar xorijlik bilan shartnoma imzolashiga ruxsat berdi. Bungacha faqat ikkita chet ellik bilan shartnoma tuzish mumkin edi.

Ushbu mavsum yakuniga etganidan so'ng birinchi liganing ikkita klubi Pro liga yo'llanmasini qo'lga kiritadi. Pro ligada 13-14 o'rinni egallagan klublar birinchi liganing 3-4 jamoasi bilan o'tish o'yinida o'ynaydi. Keyingi yildan esa Pro ligani oxirgi uchta o'rindagi jamoa tark etadi va birinchi ligadan uchta jamoa elitaga yo'l oladi. Pro liganing 13-jamoasi esa birinchi liganing to'rtinchi jamoasi bilan ikkita o'yindan iborat pley-off bahsida o'ynaydi.

Keyingi yildan Saudiya birinchi ligasida jamoalar soni 16tadan 20taga oshiriladi. G'olib jamoa federaciya tomonidan 1,3 million dollar miqdoridagi mukofot puliga ega bo'ladi. Ikkinchi liga ishtirokchilari soni esa 20tadan 24taga etkaziladi. Bundan tashqari, U-21 chempionati bekor qilinadi va uning o'rniga boshqa liga tashkil etish ustida ish olib borilmoqda.