Haqiqatdan ham iqtidorli futbolchi tez orada milliy terma saviyasiga chiqsa ajab emas. Xabaringiz bor, Muzaffar ushbu mavsum boshida AGMK safiga borib qo'shildi. Superliga boshlanishidan oldin biz futbolchi bilan suhbatlashdik.
- 3-sinfligimda “Paxtakor” akademiyasiga qabul qilindim. O'shanda ota-onamdan uzoqda yashadim. Biroq muammolar ko'payib ketdi. O'shanda oila azolarim ham Toshkentga ko'chib keldi. Men esa CHilonzordagi “Paxtakor” akademiyasiga joylashdim. Otamni murabbiy bo'lganligi uchun ham qaysi jamoa bilan shartnoma imzolasam ham aynan ularning sharofati evaziga bo'lmoqda deb o'ylashadi. Ammo unday emas. O'z kuchim bilan “So'g'diyona”da o'ynadim, AGMKga o'tdim.
- O'tgan mavsum hamda “Neftchi”dagi faoliyatingiz haqida to'xtalib o'tsangiz.
- To'g'risini aytganda, “Neftchi”ning oldiga yuqori vazifalar qo'yilgandi. Vadim Abramov jamoaga bosh murabbiy bo'lganidan so'ng, o'yin sifatimiz borasida o'sishga erishdik. Jamoa chiroyli o'ynadi. Biroq ichki muammolar sabab ishlarimiz ortga qarab ketdi. Omad etishmadi, natijalarga erisha olmadik. Oqibatda chempionatni autsayder sifatida yakunladik. CHempionatda oson o'yinning o'zi bo'lmaydi. Bizga barqarorlik ham etishmadi.
- AGMKga o'tishingiz borasida gapirib o'tsangiz. Kim sizga taklif bilan chiqdi? Boshqa jamoalardan ham takliflar bo'ldimi?
- Boshqa davlatlardan ham takliflar tushdi. Sir tutmayman, mavsum oldida menga 4 klubdan shartnoma imzolash borasida nomzodlar bor edi. Tailand va Malayziya jamoalaridan, poytaxtning kuchli klubidan ham konkret takliflar bo'lgandi. Biroq AGMK bilan kelishuvga erishib bo'lgandim. Menga shaxsan Viktor Kumikovning o'zi jamoaga qo'shilishim borasida aloqaga chiqdi. Ammo baribir menga AGMKning taklifi ko'proq yoqdi. Tailand va Malayziyadagilar AGMK bilan muzokaralar olib borishdi. Biroq klubdagilar menga ruxsat berishmadi.
- Yangi mavsumda jamoangiz oldiga qanday vazifa qo'yilgan?
- 2018 yilgi o'zbek futboli oldingilaridan ajralib turadi. Endi biz oliy ligada emas, Superligada o'ylaymiz. AGMKning oldiga kuchli oltilikka kirish vazifasi qo'yildi. SHu sababdan Turkiyada ikki marta yig'in o'tkazdik. Bu esa yangi mavsum uchun tayyorgarlikni kuchaytirish uchun xizmat qildi deb ayta olaman.
- Muxlislarga tilaklaringiz.
- Futbol – millionlar o'yini, faqatgina muxlislar uchun o'ynaladi. Xudo xohlasa, yangi Superliga mavsumida tomoshabinlar har bir stadionni to'ldirishadi, deb umid qilaman. Bundan oldin o'zim o'ynagan “Neftchi” va “So'g'diyona”ga ham omad tilayman.
Mirjalol Normatov suhbatlashdi
Bosh sahifaga
2011