Biz bugun bo'lib o'tadigan ikkita o'yin oldidan taniqli sobiq hujumchi, faoliyatining yorqin damlarini "Nasaf" va "Mashal" klublarida o'tkazib, Qashqadaryo faxriga aylangan yulduzlardan biri Zafar Xolmurodovga yuzlandik. Xolmurodov bugungi o'yinlar borasida o'z fikrini bildirdi.
- "Mavsum endi boshlanyapti. Ko'p jamoalarning tarkibi keskin o'zgarib ketgan, shu bois birinchi turdan oldin aniq bir narsa deyish qiyin. SHunga qaramay, bugungi ikkita uchrashuvga o'z fikrimni bildirib o'taman".
"Qizilqum" - "Lokomotiv" haqida:
- "Bugun Navoiyda mavsumning ochilish o'yini bo'ladi. Stadionga ko'plab muxlislar kelishi kutilmoqda. Bu o'yinda "Lokomotiv" favorit, chunki bu jamoa tarkibi ancha shakllangan, qolaversa, "Loko" chempionlar ligasida o'z o'yinini kuchaytirib oldi. "Qizilqum" haqida esa biror gap aytish qiyin. Bir nechta yangi futbolchilar tarkibga qo'shilgan deb eshitdim. "Qizilqum" bugun durang o'ynashi yoki g'alaba qozonishi mumkinmi? Mumkin albatta, mana yaqinda ko'rdik, "Espanol" ham o'z uyida "Real"ni mag'lub etdi. SHunday ekan, bu - futbol. Lekin mening taxminim "Lokomotiv" 3:1 hisobida g'alaba qozonsa kerak".
"Neftchi" - "Nasaf" haqida:
- "O'yin tomonlama "Nasaf" kuchli, lekin "Neftchi" maydon egasi sifatida o'ynaydi. Farg'onaliklar ham ko'plab yangi o'yinchilar bilan shartnoma tuzishdi. Ammo yangi tarkibning birdaniga yaxshi o'ynab ketishi oson bo'lmaydi. "Nasaf"da esa o'yin ancha shakllangan. "Nasaf" ham "Lokomotiv"ga o'xshab OCHLda o'yin amaliyotiga ega bo'ldi. Menimcha, bugun "Neftchi" asosan ishtiyoq evaziga o'ynaydi. Lekin aytib o'tganimdek, 1-tur oldidan aniq gap aytish mushkul. Taxminim esa "Nasaf" 2:0 hisobida g'alabaga erishadi".
Zafar Xolmurodovdan bugungi ikkita o'yinga bashorat
/ Kiritdi: BestMaster O'qilgan: 626
Bosh sahifaga
235